Рус Бел Eng 中文

Страйк на прадпрыемстве – гэта нонсэнс, лічыць дырэктар ААТ «Славянка» Тэймураз Бачарышвілі

На Бабруйскай «Славянцы», адным з найбуйнейшых прадпрыемстваў лёгкай прамысловасці краіны, зладжана і якасна працуе калектыў, накіраваны на развіццё сваёй вытворчасці. Работнікі фабрыкі разумеюць, што ад атрыманай выручкі залежыць іх зарплата, а дэструктыўныя дзеянні толькі пагоршаць і без таго няпростую сітуацыю, якая склалася ва ўсім свеце з-за пандэміі каранавіруса.

Швачка Лідзія Есіна працуе на фабрыцы ўжо 10 гадоў:

– Мы пастаянна занятыя. Такога, што прыходзіш на змену, а рабіць няма чаго, не было. Ну а калі ёсць праца, то ёсць і заробак. І ў нас на прадпрыемстве ён нядрэнны.

Згаджаецца з калегай тэрмаапрацоўшчык Наталля Дзядкова:

– Нам грэх скардзіцца. Я, напрыклад, адна гадую дзіця, але змагла пабудаваць кватэру. Наша праца добра аплачваецца. Галоўнае – не ленавацца. Што ў мяне зменіцца, каб дзеля нейкіх прывідных выгод выходзіць на вуліцу? Ды нічога. Каб жыць, трэба працаваць. Каб жыць добра, трэба працаваць шмат.

Былі часы, калі фабрыка атрымлівала заказы ад вядомых фірмаў і шыла вопратку пад такімі брэндамі, як Pierre Cardin, Nike, Adidas і інш. Сёння гэтага супрацоўніцтва ўжо няма, але праца з прадстаўнікамі замежнага легпрама дапамагла «Славянцы» асвоіць сучасныя тэхналогіі і з поспехам прымяніць іх пры выпуску сваёй, арыгінальнай прадукцыі. Многія прадпрыемствы лёгкай прамысловасці гавораць цяпер аб складанасцях канкурэнцыі з вытворцамі з Азіі, дзе і сыравіна, і рабочая сіла таннейшая, а значыць, цэны прадукцыі ніжэйшыя. Але на «Славянцы» перакананыя: і ва ўмовах няпростага эканамічнага саперніцтва можна развівацца.

Сёлета з пачаткам пандэміі каранавіруса ў Еўропе фабрыка пачала шыць ахоўныя медыцынскія маскі. Начальнік вытворчага аддзела Ірына Іваненка ўспамінае:

– Калі ў нашай краіне сталі фіксаваць захварэлых на каранавірус, мы адправілі ў аптэчную сетку ўсе маскі, што да таго моманту пашылі, – амаль мільён, выдатна падтрымаўшы гэтым Міністэрства аховы здароўя. Ну а крыху пазней іх сталі выпускаць і іншыя прадпрыемствы.

Не так даўно фабрыка пачала шыць скураную вопратку. Прычым выкарыстоўваючы не імпартную сыравіну, а тое, што пастаўляе мясцовы скуркамбінат. Па вялікім рахунку, для гарбароў гэты праект аказаўся палачкай-ратавалачкай. Калі ў 2013 годзе гарбарны камбінат праводзіў тэхнічнае пераўзбраенне, на прадпрыемстве разлічвалі, што беларускія абутковыя фабрыкі – асноўны рынак збыту – павялічаць аб’ёмы вытворчасці абутку. Але здарылася адваротнае, і гарбары апынуліся ў няпростай сітуацыі: для разліку па крэдытах трэба было павялічваць продажы. Заняліся новым напрамкам дзейнасці – сталі выпускаць скуру для пашыву адзення. Паралельна шукалі тых, хто асвоіць такі пашыў. І першай адгукнулася «Славянка».

Прадпрыемства пастаянна абнаўляе вытворчасць: час не стаіць на месцы, з’яўляюцца новыя тэхналогіі шыцця, і на старых машынах іх не выканаеш.

Гаворачы аб рабоце фабрыкі, дырэктар «Славянкі» Тэймураз Бачарышвілі адзначае:

– Без бесперапыннага паляпшэння, мадэрнізацыі вытворчасці выжыць вельмі цяжка. Я б сказаў, практычна немагчыма. Мінімум 150–200 тысяч долараў на год ідзе на закупку новага абсталявання. Таксама развіваем сваю тавараправодную сетку, супрацоўнічаем з інтэрнэт-магазінамі. З ростам вытворчасці расце і зарплата работнікаў фабрыкі. Людзі прыходзяць да нас зарабляць грошы. А што яны атрымаюць, не падыходзячы да станка? Нічога. Плюс да гэтага кожны работнік удзельнічае ў выкананні дагавораў, падпісаных кіраўніцтвам. Не адгрузіць наша прадпрыемства тавар, парушыць кантракт – разарвуцца сувязі. Ці выйграе ад гэтага канкрэтны рабочы? Моцна сумняваюся. Не спрачаюся, работнікі могуць выказваць свае прэтэнзіі, калі на асобна ўзятых фабрыцы ці заводзе дрэнныя ўмовы працы, заробак ніжэйшы за пражытачны мінімум, парушаецца калектыўны дагавор. Але ў такім выпадку ім трэба збірацца разам з адміністрацыяй і вырашаць праблемныя пытанні. Што тычыцца розных забастовак па палітычных матывах, то на вытворчай пляцоўцы яны наогул недапушчальныя.

Павел Минчанка, фото Андрэя Сазонава, СБ 

Пры выкарыстанні матэрыялаў актыўная гіперспасылка на mogilev-region.gov.by абавязковая