Сучасную сістэму аўтаматычнага кантролю прамысловых выкідаў усталююць на ЗТАА «Омск Карбон Магілёў»

Сучасную сістэму аўтаматычнага кантролю прамысловых выкідаў усталююць на ЗТАА «Омск Карбон Магілёў». Пра гэта паведамілі сёння падчас прэс-канферэнцыі, прысвечанай экалагічнай абстаноўцы на тэрыторыі вобласці, у тым ліку, яе маніторынгу на ўчастку №4 СЭЗ «Магілёў».

У гутарцы прынялі ўдзел старшыня Магілёўскага абласнога камітэта прыродных рэсурсаў і аховы навакольнага асяроддзя Мікалай Дзядкоў і яго намеснік Канстанцін Цеплякоў, галоўны дзяржаўны санітарны ўрач Магілёўскай вобласці, галоўны ўрач УАЗ «Магілёўскі абласны цэнтр гігіены, эпідэміялогіі і грамадскага здароўя» Святлана Нячай, начальнік філіяла «Магілёўаблгідрамет» Мікалай Кастусёў, намеснік кіраўніка адміністрацыі СЭЗ «Магілёў» Ірына Давыдзенка і інш. 

Адным з найбольш хвалюючых журналістаў пытанняў было пытанне аб сітуацыі на пакуль яшчэ не працуючым прадпрыемстве «Омск Карбон Магілёў», дзе ў перспектыве будзе выпускацца тэхнічны вуглярод. На сённяшні дзень тут завершаны пуска-наладачныя працы, вытворчасць планава прыпынена.

Падчас прэс-канферэнцыі адзначалася, што пры запуску такіх маштабных праектаў непазбежна ўзнікаюць розныя складанасці, якія лепш за ўсё ліквідаваць на «нулявым» этапе работ, чым потым марнаваць на гэта велізарныя сродкі. Так паступіла і кіраўніцтва «Омск Карбон Магілёў», якое ўзяло час для дадатковай праверкі ўсіх сістэм свайго завода. Увод у эксплуатацыю першага пускавога комплексу запланаваны на першую палову бягучага года.

Мікалай Дзядкоў пацвердзіў інфармацыю аб тым, што 18 лістапада 2018 года грамадзяне, якія пражываюць у аграгарадку Вейна Магілёўскага раёна, паведамілі дзяжурнаму Магілёўскага абласнога камітэта прыродных рэсурсаў і аховы навакольнага асяроддзя аб забруджванні тэрыторыі ў выніку магчымага выкіду вялікіх аб’ёмаў сажы на «Омск Карбон Магілёў». Група спецыялістаў, якая прыехалі на прадпрыемства, праверыла крыніцы, дзе вяліся пуска-наладачныя працы, – камеру абагравання сушыльнага барабана і факел-фільтр. Атрыманыя вынікі паказалі ў трубе наяўнасць цвёрдых часціц вышэй за ўсталяваную норму ў 40 разоў. 

«Аднак яны яшчэ не з’яўляюцца фактам устанаўлення перавышэння, бо ў адпаведнасці з п. 10.7 ЭкаНіПа 2017 года«Ахова навакольнага асяроддзя і прыродакарыстання. Патрабаванні экалагічнай бяспекі» пры правядзенні вымярэнняў выкідаў забруджвальных рэчываў у атмасферу ў выпадку, калі вынік аднаго перыядычнага вымярэння паказвае на перавышэнне значэння нормы, для ўстанаўлення факта такое вымярэнне павінна выконвацца паўторна на працягу 30 сутак, – падкрэсліў Мікалай Дзядкоў. – Лабараторыяй аналітычнага кантролю адразу ж была зроблена заяўка на правядзенне дадзенага мерапрыемства. Аднак 20-га чысла пуска-наладачныя працы на заводзе былі спынены, і пра гэта прадпрыемства інфармавала нас раней у пісьмовай форме. Гэта значыць замеры паўторна праведзены не былі».

Адначасова з праверкай на прадпрыемстве спецыялісты «Магілёўаблгідрамета» і «Магілёўскага абласнога цэнтра гігіены, эпідэміялогіі і грамадскага здароўя» арганізавалі вымярэнні на мяжы санітарна-ахоўнай зоны і на тэрыторыі населенага пункта, дадаў Мікалай Дзядкоў. Перавышэння забруджвання атмасфернага паветра ў зоне пражывання грамадзян выяўлена не было. Пры гэтым старшыня Магілёўскага абласнога камітэта прыродных рэсурсаў і аховы навакольнага асяроддзя асабліва звярнуў увагу, што прадпісанняў аб прыпыненні дзейнасці прадпрыемства ў сувязі з тым, што адбылося, камітэт не выдаваў.

Мікалай Дзядкоў адзначыў, што сітуацыя была ў экстраным парадку разгледжана на пасяджэнні з удзелам усіх зацікаўленых бакоў. Кіраўніцтву «Омск Карбон груп» накіравалі адпаведную інфармацыю, і па гэтым факце спецыялісты кампаніі праводзяць разбіральніцтва.

Прадстаўнікі прыродаахоўнай службы і санітарнай службаў запэўнілі, што без выканання строгіх нормаў экалагічнага заканадаўства ніхто не дазволіць працу завода. Перш чым ажыццявіць пуск, на прадпрыемстве ўсталююць сучасныя амерыканскія сістэмы аўтаматычнага кантролю прамысловых выкідаў, якія ў рэжыме рэальнага часу дазволяць весці бесперапынны маніторынг сітуацыі. Абсталяванне ўжо закуплена, і яго неўзабаве зманціруюць.

Акрамя таго, для ўводу ў эксплуатацыю прадстаўнікі прадпрыемства павінны звярнуцца ў абласны камітэт прыродных рэсурсаў і аховы навакольнага асяроддзя для атрымання комплекснага прыродаахоўнага дазволу, дзе будуць улічаныя ўсе наяўныя праблемы і пытанні.

У цэлым у Магілёве і Магілёўскай вобласці назіраецца тэндэнцыя зніжэння прамысловых выкідаў у атмасферу і паляпшэнне экалагічнай сітуацыі. Гэта звязана перш за ўсё з укараненнем сучасных тэхналогій, аптымізацыяй прамысловых прадпрыемстваў, а таксама мадэрнізацыяй аб’ектаў энергасістэмы. Паводле слоў Мікалая Дзядкова, Магілёў займае шостае месца сярод гарадоў Беларусі па аб’ёме выкідаў у атмасфернае паветра шкодных рэчываў.

Для кантролю за экалагічнай сітуацыяй на тэрыторыі СЭЗ «Магілёў» распрацавана і рэалізуецца з 2016 года спецыяльная праграма маніторынгу стану навакольнага асяроддзя. Яе асноўныя выканаўцы – Магілёўскі абласны камітэт прыродных рэсурсаў і аховы навакольнага асяроддзя, «Магілёўаблгідрамет» і «Магілёўскі абласны цэнтр гігіены, эпідэміялогіі і грамадскага здароўя». Дадзеныя службы і ведамствы праводзяць штомесячнае вымярэнне стану атмасфернага паветра як на мяжы санітарна-ахоўных зон, на тэрыторыях пражывання насельніцтва, так і на асноўных крыніцах выкідаў прадпрыемстваў свабоднай эканамічнай зоны. 

«Мы максімальна ахопліваем магчымыя для даследавання паказчыкі, –зазначыла Святлана Нячай. – У праграму лабараторнага кантролю, якая рэалізуецца на працягу апошніх трох гадоў, уключана 14 паказчыкаў. З красавіка бягучага года асвойваем і ўжо даследуем у тэставым рэжыме яшчэ 5. Усе яны адносяцца да спецыфічных забруджвальніках нашых вытворчасцяў. Стараемся максімальна кропкава вывучаць і кантраляваць сітуацыю на межах санітарна-ахоўнай зоны СЭЗ «Магілёў» і на тэрыторыі жылой забудовы. Наша лабараторыя акрэдытавана, пацверджана тэхналагічная кампетэнтнасць. Усталяваны графік маніторынгу вытрымліваецца. Пры гэтым любы званок грамадзян, якія пражываюць у найбліжэйшых населеных пунктах, прымаецца і ў максімальна кароткія тэрміны, у тым ліку ў выхадныя, нашы спецыялісты выязджаюць на месца і робяць неабходныя вымярэнні». Усе гэтыя меры будуць прымяняцца і да «Омск Карбон Магілёў».

Адным з момантаў, якія кампенсуюць рызыку ўздзеяння выкідаў шкодных рэчываў на насельніцтва момантаў, з’яўляецца азеляненне. Для«Омск Карбон Магілёў» рэгламентавана арганізацыя дадзенай зоны не менш за 30% ад плошчы, а па праекце – усе 42%.