«Свята бульбы» збярэ аматараў нацыянальнага брэнда ў Касцюковіцкім раёне

Месца правядзення «Свята бульбы-2022» – вёска Забычанне Касцюковіцкага раёна Магілёўскай вобласці. У праграме: тэатралізаванае прадстаўленне, канцэртная праграма, выстава-дэгустацыя страў з бульбы, кірмаш майстроў.

Дырэктар Цэнтралізаванай клубнай сістэмы Касцюковіцкага раёна Святлана Казлова лічыць, што брэндавыя святы набіраюць папулярнасць сярод вяскоўцаў:

– Свята будзе праходзіць на базе Забычанскага дома культуры, але ўдзел у ім прымаюць усе сельсаветы і творчыя калектывы раёна. Бульбяны фэст ужо стаў традыцыйным. Сёлета здзівяць тэматычныя пляцоўкі «Бульбяны рай»: кожны сельсавет абсталюе свой падворак, найлепшы вызначыць журы. Абавязковы элемент – выстава-дэгустацыя традыцыйных і арыгінальных страў з бульбы. На галоўнай сцэне выступяць творчыя калектывы, а галоўным героем тэатралізацыі будзе Каралева Бульба. Вырабы і фотазона таксама будуць на бульбяную тэматыку.

У Касцюковіцкім раёне ўжо сем брэндавых святаў. У аграгарадку Муравілле адзначаюць раённае свята «Яблычны Спас», у Новых Самацевічах праводзяць «Ільінскі кірмаш», абрадавае свята-кірмаш «Гусінае свята» праходзіць у Белай Дуброве, абрадавае свята «Соракі» і іншыя.

СБ