Свята «Купалле» ў Александрыі. Якім ён будзе сёлета?

Выстава-кірмаш «Купальскае дрэва жыцця» ўвойдзе ў лік самых масавых і відовішчных мерапрыемстваў на свяце «Купалле» («Александрыя збірае сяброў»), якое адбудзецца 5-6 ліпеня ў Шклоўскім раёне. Аб гэтым паведамілі ў Магілёўскім абласным метадычным цэнтры народнай творчасці і культурна-асветнай работы.

У выставе-кірмашы прымуць удзел творчыя дэлегацыі ўсіх рэгіёнаў Беларусі, а таксама 28 рэгіёнаў Расіі. Экспазіцыя адлюструе тэматыку Года добраўпарадкавання, а таксама зробіць акцэнт на культурнай спадчыне дзвюх краін, самабытнасці народнай культуры і яе рэгіянальных асаблівасцях, прэзентуе творчасць майстроў дэкаратыўна-прыкладнога мастацтва.

Часткай свята стане фінал рэгіянальнага конкурсу «Дрэва жыцця», у якім заяўлена каля 60 удзельнікаў з Магілёўскай вобласці. У розных відах і тэхніках дэкаратыўна-прыкладнога мастацтва яны прадставяць аб'ёмныя кампазіцыі, пано, вышытыя і тканыя ручнікі з выявай дрэва жыцця.

На малой сцэнічнай пляцоўцы пройдзе ўрачыстае адкрыццё рэспубліканскага свята «Купалле». Цягам дня будзе працаваць канцэртная сцэнічная пляцоўка «Беларусь. Адзінства. Мы», на якой беларускія калектывы з усёй краіны прадставяць разнажанравыя канцэртныя і творчыя праграмы.

Пройдзе вялікі купальскі карагод «Няхай сяброўства карагод закруціць». Усе ахвочыя таксама змогуць далучыцца да майстар-класа па пляценні традыцыйнага купальскага вянка.

Рэспубліканскае свята «Купалле» («Александрыя збірае сяброў») традыцыйна пройдзе на беразе ракі Дняпро. Гэтая лакацыя са старажытных часоў аб'ядноўвала ўсходнеславянскія народы, была артэрыяй знакамітага шляху «з варагаў у грэкі». Штогод свята збірае некалькі дзясяткаў тысяч гасцей, прафесійных і аматарскіх творчых калектываў, майстроў дэкаратыўна-прыкладнога мастацтва.

БЕЛТА