Свята радасці, дзяцінства і новых знаёмстваў. Фестываль «Анімаёўка» стартаваў у Магілёве

XXVII Міжнародны фестываль анімацыйных фільмаў «Анімаёўка» ўрачыста адкрыўся ў Магілёве. З 25 па 27 верасня гасцей і ўдзельнікаў мерапрыемства чакаюць конкурсы, выставы, майстар-класы, творчыя сустрэчы і шмат аўтарскай анімацыі.

«Анімаёўка» - свята радасці, дзяцінства, сяброўства, новых знаёмстваў і досведу, - падкрэсліў на адкрыцці мерапрыемства намеснік старшыні Магілёўскага аблвыканкама Алег Сцельмашок. – Мы ўпэўненыя, што гэты фестываль будзе і надалей збіраць у сваім коле аднадумцаў, аб'яднаных сілай творчасці».

Сёлета на «Анімаёўцы» традыцыйна пройдуць конкурсы анімацыйных фільмаў і дзіцячай анімацыйнай творчасці, а таксама дзіцячага выяўленчага мастацтва і дэкаратыўна-прыкладной творчасці. На фестываль былі заяўлены 317 фільмаў з 47 краін свету, упершыню свае працы даслалі В'етнам, Трынідад і Табага. У сваю чаргу на конкурс дзіцячага выяўленчага мастацтва і дэкаратыўна-прыкладной творчасці паступіла больш за 130 работ з Беларусі. Пераможцаў чакаюць Гран-пры і дыпломы па намінацыях, якіх стала больш: сёлета журы таксама трэба выбраць лепшы анімацыйны серыял.

За гады правядзення «Анімаёўка» стала значнай падзеяй у культурным жыцці рэгіёна і краіны. Статус мерапрыемства расце, і пацвярджэннем гэтага стаў той факт, што з 2024 года пераможцы фестывалю будуць атрымліваць дадатковыя балы пры паступленні ў Маскоўскі дзяржаўны інстытут культуры. Дарэчы, кафедру анімацыі і мультымедыя ВНУ ўзначальвае Сяргей Струсоўскі - рэжысёр кінастудыі «Саюзмультфільм» і член кінематаграфістаў Расіі, які не першы год прыязджае на фестываль у Магілёў. Больш за тое, ён з'яўляецца старшынёй журы конкурсу дзіцячай анімацыйнай творчасці.

«Цікавасць у тым, каб вырасла новае пакаленне аніматараў, якія прыйдуць у анімацыйную галіну і актыўна будуць у ёй працаваць, - падкрэсліў ён. - А да гэтага яны павінны зрабіць свае фільмы і паўдзельнічаць у «Анімаёўцы». Цяпер у дзяцей для старту ёсць больш чым дастаткова: нават на звычайным смартфоне, у тым ліку дзякуючы бясплатным дадаткам, яны маюць магчымасць навучыцца ствараць анімацыйныя фільмы ў розных тэхналогіях, уключаючы графіку і аб'ёмную лялечную анімацыю. У свой час мы аб гэтым нават не марылі. Сёння ўсё значна прасцей, чым было раней: стаць прафесіяналам і займацца свабоднай творчасцю на любой студыі свету можна маючы толькі камп'ютар і інтэрнэт».

Па словах Сяргея Струсоўскага, у наш час аніматары - і дзеці, і дарослыя - цікавяцца зусім рознымі тэмамі. Напрыклад, шмат праектаў закранаюць пытанні патрыятычнага выхавання: дзеці ажыўляюць герояў Вялікай Айчыннай вайны, вывучаюць і перадаюць на экране значныя гістарычныя падзеі. І такая анімацыя мае вельмі магутны пасыл, які пакідае глыбокі сьлед на ўсё жыцьцё. Акрамя таго, асобны напрамак - адукацыйная анімацыя, калі разам з педагогамі юнакі і дзяўчаты ствараюць мультыплікацыйныя праекты па асобных прадметах і тэмах. Навучэнцы нават экранізуюць творы рускай літаратуры, і гэта пахвальна - бо такі падыход дазваляе па-новаму зірнуць на навучальны матэрыял. Тым больш праекты ствараюць для дзяцей не дарослыя, а самі равеснікі.

Ганаровым госцем фестывалю «Анімаёўка» таксама стаў заслужаны дзеяч мастацтваў Расіі, прафесар і дырыжор камернага аркестра народных інструментаў «Скамарохі» Санкт-Пецярбургскага дзяржаўнага інстытута культуры Віктар Акуловіч. «Вельмі прыемна, што менавіта ў Магілёве праходзіць такі цікавы і прадстаўнічы фестываль, як «Анімаёўка», - падкрэсліў ён. - Мультыплікацыя - асаблівая і блізкая для мяне тэма, таму што са сваім аркестрам я ў тым ліку запісваў музыку да мультфільмаў, а менавіта ў мульціках кампазітары выказваюць свой стан і характар, выкарыстоўваючы розныя музычныя інструменты. Цешыць, што ў «Анімаёўцы» бяруць удзел дзеці, якім важна перадаць прыгажосць і энергетыку нашых мульцікаў, а таксама данесці той факт, што створаныя ў Беларусі і Расіі мультфільмы карыстаюцца папулярнасцю ва ўсім свеце, таму што яны сардэчныя, па-дзіцячы непасрэдныя і кранаюць нашыя сэрца».

У фестывальныя дні запланаваны паказы анімацыйных фільмаў, творчыя сустрэчы, майстар-класы, прэзентацыі, выставы. Упершыню ў гісторыі фестывалю пройдзе серыя майстар-класаў па анімацыі з выкарыстаннем штучнага інтэлекту, аўтарам якіх выступіць AI аніматар, рыгер і лэйаўт артыст з Расіі Таццяна Сіманава. «Першы майстар-клас прысвечаны сэрвісам, якія выкарыстоўваюцца вялікімі студыямі, каб генераваць кантэнт (ажыўляць статычныя карцінкі, рабіць агучванне і музычнае суправаджэнне), – адзначыла яна. – Ужо на другім майстар-класе мы паспрабуем зрабіць уласную кароткаметражку. Цяпер многія студыі шырока выкарыстоўваюць штучны інтэлект для стварэння сцэнарыяў і канцэптаў. І гэта вялікі плюс - мультыплікацыйны прадукт можна зрабіць значна хутчэй, з меншымі выдаткамі і без вялікага штата аніматараў».

Гасцей і ўдзельнікаў фестывалю сёлета будзе чакаць яшчэ адзін сюрпрыз - дзве творчыя сустрэчы са спявачкай і актрысай агучвання 12-гадовай Юліяй Зунікавай, голасам якой ужо больш за 5 гадоў гаворыць галоўная гераіня серыяла пра Машу і Мядзведзе. «У «Анімаёўцы» ўдзельнічаю ўпершыню, і мне было вельмі цікава пабываць тут: па-першае, таму што гэта вялікае свята мультыплікацыі, па-другое, таму што Магілёў - родны горад маёй прабабулі, - усміхаецца Юлія. - Для мяне анімацыя - не толькі цікавасць, але і вялікі досвед, і ў будучыні я вельмі хачу, каб мая прафесія была звязаная з музыкай і гэтым кірункам творчасці».

БЕЛТА