Святлана Шутава: дыялогавыя пляцоўкі – своеасаблівы механізм кансалідацыі грамадства

Дыялогавыя пляцоўкі – своеасаблівы механізм кансалідацыі грамадства. Такім меркаваннем з журналістамі падзялілася дэпутат Палаты прадстаўнікоў Святлана Шутава падчас абмеркавання тэматычнага блока «Павышэнне ролі мясцовага кіравання і самакіравання з праекцыяй на развіццё рэгіёнаў», якое прайшло сёння ў Магілёве.

«Абмяркоўваць надзённыя праблемы нічога не перашкаджала і без дыялогавых пляцовак, але іх абвяшчэнне ўсіх падштурхнула да дзеяння. Гэта своеасаблівы механізм кансалідацыі грамадства. Усе мы розныя, са сваімі перакананнямі, але ва ўсіх ёсць адно жаданне – зрабіць жыццё лепшым, у прыватнасці ў рэгіёне, дзе непасрэдна пражываеш, – адзначыла Святлана Шутава. – Дыскусіі на пляцоўках сёння ў Магілёве і раней у Асіповічах, дзе я прысутнічала, атрымаліся. Яны былі адкрытымі, неадназначнымі. Прысутнічалі прадстаўнікі і канструктыўнай апазіцыі, і бізнесу, улады, дэпутаты. Гэтая аўдыторыя працуе непасрэдна на месцах, дае канкрэтныя і слушныя прапановы. Форма самакіравання сябе добра зарэкамендавала. Шмат ёсць добрых напрацовак, і перакрэсліваць іх нельга і няправільна».

Паводле слоў Святланы Шутавай, людзі падышлі да абмеркавання вельмі адказна. «Абмяркоўваліся пытанні канстытуцыйнай рэформы. Людзей гэта хвалюе, яны падышлі з душой і канкрэтнымі прапановамі, якія адправяцца спачатку на абласны ўзровень, а затым у парламент. Гэтым пытаннем непасрэдна займаецца Пастаянная камісія па дзяржаўным будаўніцтве, мясцовым самакіраванні і рэгламенце. Зараз ідзе збор прапаноў, яны акумулююцца, потым будзем над гэтым працаваць. Зразумела, што людзей сёння хвалюе і наш асноўны закон–Канстытуцыя, але і пытанні мясцовага самакіравання і адміністрацыйна-тэрытарыяльнага дзялення таксама не губляюць сваёй актуальнасці. І калі аналізаваць тое, што паступае ў парламент, то зразумела, што там пытанні не толькі асноўнага закона, але і тыя, якія павінны ўвайсці ў іншыя заканадаўства».

БЕЛТА