Сярэбраны прызёр Алімпійскіх гульняў у Ванкуверы Сяргей Новікаў: «Віншую Антона, малайчына, баец!»

Сярэбраны прызёр Алімпійскіх гульняў 2010 года, начальнік упраўлення спорту і турызму Магілёўскага аблвыканкама Сяргей Новікаў прызнаўся, што глядзець гонку ў прамым эфіры яму было эмацыйна складана.

«Зразумела, што цяжка бегчы, але і цяжка глядзець гонку. Глядзіш, перажываеш, таму што разумееш усе нюансы, якія могуць быць на трасе, на стрэльбішчы. Разумееш, якія пачуцці былі ў спартсменаў на заключным рубяжы. Той жа расіянін Максім Цвяткоў не справіўся з апошнім стрэлам і Тар’ей Бё не справіўся. У нашага Антона Смольскага атрымалася ўсё, – растлумачыў Сяргей Новікаў. – Дакладна такая ж сітуацыя была ў мяне ў 2010-м, калі я заваяваў срэбра на Алімпійскіх гульнях. Вельмі рады за ўсю нашу каманду, што ўдалося падтрымаць традыцыі беларускага біятлона, на годным узроўні спартсмены паказваюць вынікі на працягу ўсяго сезона. І на Алімпіядзе ўжо ёсць медаль. Віншую Антона, малайчына, баец! Усю нашу каманду віншую».

Прагнозы спаборніцтвам біятланістаў Сяргей Новікаў рабіць не стаў, заўважыў толькі: «Трэба проста верыць у каманду. Глядзець, хварэць за ўсіх спартсменаў. Ніхто не хоча і спалохаць поспех. Будзем глядзець кожную гонку і хварэць як за мужчынскую каманду, так і за жаночую. Спадзяёмся, што будуць годныя вынікі».

Беларускі біятланіст Антон Смольскі стаў сярэбраным прызёрам Алімпіяды ў індывідуальнай гонцы на 20 км з чатырма агнявымі рубяжамі.

БЕЛТА