Сяргей Май з Магілёўскага раёна першым у краіне намалаціў 10 тыс. тон новага ўраджаю

Камбайнер ЗАТ «Сервалюкс Агра» Сяргей Май з Магілёўскага раёна першым у краіне намалаціў 10 тыс. т новага ўраджаю. Цёплыя віншаванні лідэр жніва прымаў проста ў полі, дзе ўбірае кукурузу на зерне.

Сяргей Май у гэтым уборачным сезоне - абсалютны лідэр у Магілёўскай вобласці: да тысячных вынікаў ён прыходзіў першым. «Задаў высокі тэмп, зараз трэба яго падтрымліваць», - дзеліцца перадавік. У гаспадарцы ўжо ўбралі збожжавыя і рапс, а дзесяцітысячную мяжу ён пераадолеў на ўборцы кукурузы на зерне.

«Заўсёды прыемна быць першым: віншуюць, узнагароджваюць. Але за ўсімі рэкордамі - вялікая і складаная работа, - дзеліцца камбайнер. - Прыбралі пшаніцу, ячмень, рапс, а зараз падаспела кукуруза на зерне, так што працягваем працаваць. Кукурузу прыбіраем ужо недзе два тыдні. Стараемся. Ураджай у нас добры».

Высокія ўзнагароды, адзначае Сяргей Май, гэта не толькі прыемна, але і дадатковая адказнасць працаваць яшчэ лепш, яшчэ больш якасна.

Словы віншаванняў і пажаданні новых дасягненняў камбайнер-перадавік атрымаў ад прадстаўнікоў Магілёўскага аблвыканкама, Магілёўскага райвыканкама і кіраўніцтва гаспадаркі.

Як распавёў намеснік дырэктара па аддзяленні «Гуслішчы» ЗАТ «Сервалюкс Агра» Аляксей Дземідзенка, палявыя працы ў гаспадарцы ідуць поўным ходам. На полі каля вёскі Навасёлкі ўбіраюць царыцу палёў, тут яе ўраджайнасць даходзіць да 100 ц/га. Вопытны аграрый адзначыў, што гэты год атрымаўся для сельскай гаспадаркі спецыфічным: з-за надвор'я культуры падышлі хутчэй, а таму і ўборка пачалася намнога раней. «Як і ўсе яравыя культуры, кукуруза сёлета падышла раней, і яна значна сушэйшая. Мы пачалі прыбіраць у пачатку верасня, летась - у сярэдзіне месяца. Раней стартавалі з вільготнасці 32 працэнты, а ў гэтым - 23 працэнты. Цяпер вільготнасць апусцілася да 18%. Гэта дапаможа нам зэканоміць на сушцы, - распавёў Аляксей Дземідзенка. - У гаспадарцы стала ўбраць 35% плошчаў кукурузы, завяршыць уборку плануем на наступным тыдні. А далей мы будзем прадаўжаць сяўбу - пасеяна ўжо збожжавых 3,3 тыс. га з 5 тыс. га. Зыходзячы з умоў гэтага года, было прынята рашэнне рабіць стаўку на азімыя культуры. Бо з году ў год яны даюць больш высокі і стабільны ўраджай. З яравых культур у нас застануцца цукровыя буракі, яравы рапс і кукуруза на зерне».

Яшчэ адзін эксперымент у гаспадарцы - соя. Яе пасеялі на плошчы крыху больш за 40 га і хутка таксама пачнуць уборку. Калі яна сябе апраўдае, плошчы будуць павялічваць.

Паводле слоў намесніка старшыні - начальніка ўпраўлення па сельскай гаспадарцы і харчаванні Магілёўскага райвыканкама Генадзя Давыдава, з-за скарачэння вегетацыйнага перыяду ўраджай атрымаўся крыху меншы, чым чакалі, але ўсё роўна добры. «На сённяшні дзень намалацілі 131 тыс. т збожжа з улікам кукурузы. Цяпер вядзецца ўборка кукурузы на зерне - яна пасеяна на плошчы больш як 4 тыс. га. У раёне сабрана ўжо больш за 28% плошчаў, - паведаміў ён. - У гэтым годзе кукуруза паказвае небывалую вільготнасць. Раней мы прыбіралі яе з вільготнасцю не менш за 32%, а гэта вялікія выдаткі на сушку, але ў гэтым годзе мы зэканомім тут свае рэсурсы.».

БЕЛТА