Сяргей Новікаў аб гатоўнасці Магілёва да II Гульняў краін СНД: з нецярпеннем чакаем удзельнікаў і гасцей

У Магілёве з нецярпеннем чакаюць удзельнікаў і гасцей ІІ Гульняў краін СНД. Да сустрэчы горад готаў. Аб гэтым расказаў начальнік упраўлення спорту і турызму Магілёўскага аблвыканкама Сяргей Новікаў.

«Падрыхтоўка да такога масавага спартыўнага мерапрыемства ў горадзе вялася практычна паўгода, зараз мы ўжо на фінішы гэтага шляху. Усе віды работ на двух аб'ектах, якія прымаюць спаборніцтвы па каратэ і стральбе з лука, завершаны. Так, на стадыёне «Спартак», дзе будуць спаборнічаць у стральбе з лука, устанавілі новае табло, паклалі сучасныя лёгкаатлетычныя дарожкі, зрабілі рамонт у раздзявалках і пераабсталявалі іх. У спарткомплексе «Алімпіец», дзе пройдуць спаборніцтвы па каратэ, таксама завяршыліся ўсе запланаваныя рамонтныя работы - тут таксама з'явілася новае і сучаснае табло, правялі касметычны рамонт. Абедзве спартыўныя пляцоўкі, як і ўвесь горад у цэлым, з нецярпеннем чакаюць удзельнікаў і гасцей».

Як расказаў Сяргей Новікаў, гасцей у абласным цэнтры чакаецца шмат. «Каля 100 чалавек, сярод якіх спартсмены, трэнеры, суддзі і медперсанал, прыедуць да нас на стральбу з лука. Удзельнікі прыедуць з 9 краін. Усе яны пройдуць акрэдытацыю ў мінскім аэрапорце, а пасля ўжо мы прывязем іх у Магілёў, - падзяліўся планам начальнік упраўлення. - На спаборніцтвы па каратэ мы чакаем каля 250 чалавек, 10 каманд. Цяпер яшчэ каманды дазаяўляюцца. Верагодна, спіс павялічыцца».

Размяшчаць гасцей будуць у гатэлі «Магілёў». «Пытанні камфортнага размяшчэння і харчавання будуць у зоне адказнасці кіраўніцтва гатэля. Там таксама ўсё гатова да вялікага спартыўнага свята», - распавёў Сяргей Новікаў.

Цяпер у Магілёве працягваецца ўпрыгожванне горада да II Гульняў краін СНД. «На саміх спартыўных аб'ектах завяршаецца іх брэндзіраванне. У горадзе з'явіліся банеры, расцяжкі. Рэклама ўжо ідзе па ўсіх каналах СМІ», - адзначыў ён.

Афіцыйнае адкрыццё ІІ Гульняў краін СНД пройдзе 5 жніўня ў Мінску з удзелам усіх спартсменаў. У Магілёве перад пачаткам спаборніцтваў абавязкова правядуць цырымонію прывітання. «Мы абавязкова правядзём такую цырымонію, каб кожная каманда змагла выйсці пад сваім сцягам, павітаць арганізатараў, сапернікаў і балельшчыкаў. Для стварэння святочнага настрою пройдуць невялікія канцэртныя выступленні. Гэты момант ужо прапрацаваны з установамі культуры горада, - расказаў Сяргей Новікаў. - Мы прыклалі максімум намаганняў для таго, каб у спартсменаў была магчымасць раскрыцца на поўную сілу, а гасцям і турыстам у Магілёве было цікава. Упэўнены, што спаборніцтвы ў нашым горадзе пройдуць на годным, высокім узроўні і запомняцца ўсім».

БЕЛТА