Сёння стартаваў збор подпісаў для вылучэння кандыдатаў у Прэзідэнты Беларусі

Сёння стартаваў збор подпісаў для вылучэння кандыдатаў у Прэзідэнты Рэспублікі Беларусь.

ЦВК зарэгістраваны 7 ініцыятыўных груп па зборы подпісаў у падтрымку вылучэння кандыдатаў у Прэзідэнты: дзейнага Прэзідэнта Рэспублікі Беларусь Аляксандра Лукашэнкі, старшыні Ліберальна-дэмакратычнай партыі Беларусі Алега Гайдукевіча, старшыні Рэспубліканскай партыі працы і справядлівасці Аляксандра Хіжняка, начальніка галоўнага ўпраўлення ідэалагічнай работы і па справах маладзёна Вольгі Чамаданавай, індывідуальнага прадпрымальніка Ганны Канапацкай, старшыні Рэспубліканскай рады грамадскага аб'яднання «Беларускі саюз афіцэраў» Сяргея Бобрыкава, першага сакратара Цэнтральнага камітэта Камуністычнай партыі Беларусі Сяргея Сыранкова.

Збор подпісаў у падтрымку вылучэння кандыдатаў у Прэзідэнты стартаваў сёння і завершыцца 6 снежня 2024 года. Зарэгістраваным ініцыятыўным групам неабходна сабраць не менш як 100 тыс. подпісаў. Ажыццяўляць збор подпісаў могуць толькі сябры ініцыятыўнай групы на пікетах (у месцах, не забароненых мясцовымі выканаўчымі і распарадчымі органамі), а таксама па месцы жыхарства, працы (службы) выбаршчыкаў. Член ініцыятыўнай групы павінен мець пры сабе адпаведнае пасведчанне і дакумент з фатаграфіяй, які пацвярджае яго асобу. У падпісным лісце павінны быць подпісы выбаршчыкаў, якія пражываюць на тэрыторыі раёна, горада, раёна ў горадзе. Выбаршчык павінен уласнаручна паставіць дату подпісу і распісацца. Падпісны ліст завяраецца сябрам ініцыятыўнай групы.

Пры зборы подпісаў не дапускаецца ўдзел адміністрацыі арганізацыі ў зборы подпісаў, прымус у працэсе збору подпісаў, узнагароджанне выбаршчыкаў за ўнясенне подпісу, раздача інфармацыйных матэрыялаў аб асобах, якія вылучаюцца кандыдатамі ў Прэзідэнты. Выбаршчык мае права паставіць подпіс у падтрымку некалькіх кандыдатур, якія прапануюцца для вылучэння кандыдатамі ў Прэзідэнты, але толькі адзін раз у падтрымку адной і той жа кандыдатуры.

Падпісныя лісты трэба прадставіць у адпаведныя раённыя, гарадскія (у гарадах абласнога падпарадкавання, акрамя гарадоў з раённым дзяленнем), раённыя ў гарадах камісіі не пазней за 6 снежня 2024 года. У дзесяцідзённы тэрмін будзе праходзіць праверка дакладнасці подпісаў выбаршчыкаў у падпісных лістах, здадзеных сябрамі ініцыятыўных груп. Калі колькасць выяўленых пры праверцы несапраўдных подпісаў выбаршчыкаў складзе больш за 15 працэнтаў ад колькасці правераных подпісаў (першапачаткова адбіраецца 20 працэнтаў), праводзіцца дадатковая праверка яшчэ 15 працэнтаў подпісаў выбаршчыкаў ад колькасці подпісаў у падпісных лістах, здадзеных у адпаведную камісію. У выпадку, калі сумарная колькасць несапраўдных подпісаў выбаршчыкаў, выяўленых пры праверках, складзе больш за 15% ад агульнай колькасці правераных подпісаў, усе подпісы выбаршчыкаў у здадзеных у адпаведную тэрытарыяльную камісію падпісных лістах не ўлічваюцца.

Выбары Прэзідэнта Беларусі назначаны на 26 студзеня 2025 года.

БЕЛТА