Творчасць, якая аб'ядноўвае: галерэя пад адкрытым небам адкрылася ў цэнтры Магілёва

Галерэя пад адкрытым небам адкрылася ў самым цэнтры Магілёва, на ёй прадстаўлена 80 мастацкіх работ. Пра гэта расказалі ва ўпраўленні культуры Магілёўскага гарвыканкама.

На плошчы Адзінства ўстанавілі дзясятак кубоў, на якіх размешчаны мастацкія работы. Канструкцыі замацаваны, а матэрыял, на які нанесены выявы, не баіцца непагадзі і яркага сонца.

Як расказалі арганізатары, выстава аб'ядноўвае ў сабе два блокі. Адзін з іх – «Магілёў вачыма сяброў», дзе прадстаўлены мастацкія работы з дзіцячых школ мастацтваў гарадоў-пабрацімаў і гарадоў-партнёраў абласнога цэнтра. «Удзельнікамі выставы пад адкрытым небам сталі 13 гарадоў, з якімі ў Магілёва склаліся шматгадовыя сяброўскія адносіны. Гараджанам і гасцям горада будзе цікава даведацца, якім бачаць наш горад нашы маленькія сябры», - адзначылі арганізатары.

Другі блок экспазіцыі – «Магілёў вачыма дзяцей». Тут аўтарамі творчых работ сталі навучэнцы дзіцячых школ мастацтваў самога Магілёва. Усе работы атрымаліся яркімі і вельмі прыгожымі, дадалі арганізатары.

Тэматычная выстава прымеркавана да 756-годдзя Магілёва і Дня Незалежнасці. Як адзначылі ў гарвыканкаме, дата заканчэння працы экспазіцыі не ўстаноўлена. «Мы не ставілі сабе нейкія часовыя рамкі. Хочацца, каб як мага больш гараджан і гасцей наведалі нашу галерэю пад адкрытым небам», - адзначылі ў гарвыканкаме.

БЕЛТА