У ААТ «Рассвет імя К. П. Арлоўскага» прыступілі да ўборкі ўраджаю кавуноў

У ААТ «Рассвет імя К. П. Арлоўскага» Кіраўскага раёна пачалася ўборка ўраджаю кавуноў. Пра гэта паведаміў аграном-гароднінавод сельскагаспадарчага прадпрыемства Іван Фядотаў.

Першыя 12 т салодкіх пладоў ужо паступіла ў фірмовую гандлёвую сетку. Бахчавыя айчыннай вытворчасці можна знайсці ў Бабруйску, Кіраўску і Магілёве. Нягледзячы на капрызы надвор’я ў гэтым годзе (шмат вільгаці, але мала святла і цяпла), кавуны ўсё ж паспелі. У сярэднім вага аднаго складае 6-7 кг, некаторыя асобнікі даходзяць да 10 кг. Іх мякаць ледзь святлейшая, чым у мінулым годзе, аднак усё такая ж сакавітая і салодкая. Яшчэ адна адметная асаблівасць рассветаўскай ягады – тонкая лупіна.

«Уборку пачалі крыху пазней – летась першаму ўраджаю радаваліся ўжо ў канцы ліпеня, у гэтым пробную партыю бахчавых сабралі крыху больш за тыдзень таму, – адзначыў Іван Фядотаў. – Уборка праводзіцца раз на 1-2 дні па меры паспявання пладоў. Як і раней, збіраюць кавуны ўручную. Калі не ўмяшаецца надвор’е, плануем атрымаць ураджай не ніжэйшы за леташні».

У «Рассвеце» вырошчваюць кавуны ўжо трэці год, і вынікамі такога смелага ў беларускіх умовах сельскагаспадарчага эксперыменту задаволеныя. Так, у першы год тут сабралі каля 64 т бахчавых пры ўраджайнасці 123 ц/га, у другі – больш за 100 т пры 200 ц/га. Вясной гэтага года салодкую ягаду высадзілі зноў – 30 тыс. саджанцаў швейцарскай і галандскай селекцыі размясцілася на плошчы 5 га.

ААТ «Рассвет імя К. П. Арлоўскага» – найбуйнейшае ў вобласці прадпрыемства АПК і адзіная ў рэгіёне гаспадарка, якая вырошчвае кавуны ў прамысловых маштабах. Спелыя ў мінулым годзе бахчавыя паступілі на ўнутраны рынак Беларусі. Іх можна было знайсці ў рознічнай сетцы Бабруйска, Магілёва, Кіраўскага раёна і нават Мінска.

БЕЛТА