У Бабруйску грамадскія аб’яднанні Беларусі і Расіі падпісалі Мемарандум аб супрацоўніцтве

23 чэрвеня 2022 года ўвойдзе ў гісторыю Бабруйска як дзень падпісання Мемарандума аб супрацоўніцтве паміж Ленінскай раённай арганізацыяй Бабруйска РГА «Белая Русь» і мясцовай грамадскай арганізацыяй «Беларуская нацыянальна-культурная аўтаномія “Нёман”» гарадской акругі Тальяці. Урачыстае падпісанне Мемарандума адбылося ў габеленавай зале Магілёўскага абласнога тэатра драмы і камедыі імя В. І. Дуніна-Марцінкевіча. Дакумент змацавалі подпісамі старшыня Ленінскай раённай арганізацыяй Бабруйска РГА «Белая Русь Ірына Русаковіч і старшыня праўлення мясцовай грамадскай арганізацыяй «Беларуская нацыянальна-культурная аўтаномія “Нёман”» гарадской акругі Тальяці Людміла Дзёміна. Пра гэта кіраўнікі грамадскіх аб’яднанняў расказалі карэспандэнту sb.by.

Ірына Русаковіч адзначыла:

– 6 чэрвеня 2022 года Бабруйск і Тальяці сталі гарадамі-пабрацімамі, у адміністрацыі Тальяці было падпісана пагадненне аб намерах. Старшыня Бабруйскага гарвыканкама Аляксандр Студнеў і кіраўнік Тальяці Мікалай Рэнц замацавалі сяброўскія адносіны моцным поціскам рукі, адкрыўшы дарогу для далейшага супрацоўніцтва, у тым ліку і грамадскім арганізацыям. Падпісаны сёння Мемарандум стане чарговым, вельмі сур’ёзным этапам нашага ўзаемадзеяння ў межах Саюзнай дзяржавы.

Людміла Дзёміна ў сваю чаргу падкрэсліла, што падпісанне Мемарандума – дакладны крок ва ўмацаванні вялікай дружбы, якая аб’ядноўвае нашы народы на розных гістарычных этапах:

– У нас агульная гісторыя, падобныя традыцыі і культурныя каштоўнасці. Наша дэлегацыя пераканана, што гэта сустрэча стане не толькі сімвалам братэрства і сяброўства, але і значна пашырыць сувязі ва ўсіх сферах жыцця нашых рэгіёнаў.

Прадметам Мемарандума з’яўляецца сумесны ўдзел бакоў у мерапрыемствах рэгіянальнага і міжнароднага характару, падрыхтоўцы сумесных выданняў, абмене інфармацыйнымі матэрыяламі, якія прадстаўляюць узаемную цікавасць, грамадзянска-патрыятычным выхаванні моладзі, арганізацыі сумесных праектаў і праграм.

У завяршэнне мерапрыемства бакі абмяняліся памятнымі падарункамі і зрабілі фатаграфіі на памяць.

СБ