У Беларусі адмяняецца дыферэнцыраваная плата за некаторыя ЖКП

У Беларусі адмяняецца дыферэнцыраваная плата за тэхнічнае абслугоўванне жылых дамоў, паслугі водазабеспячэння, водаадвядзення, а таксама электрычную энергію ў залежнасці ад аб'ёмаў спажывання. Гэта прадугледжана пастановай Савета Міністраў ад 9 лютага 2019 года нумар 81, паведамілі ў прэс-службе ўрада.

Пастановай уводзіцца новая група спажыўцоў электраэнергіі, жылыя памяшканні якіх абсталяваны асобнымі прыборамі індывідуальнага ўліку расходу электраэнергіі і стацыянарна ўстаноўленымі або ўбудаванымі прыёмнікамі электрычнай энергіі для патрэб ацяплення і гарачага водазабеспячэння (пры адсутнасці цэнтралізаванага цепла- і газазабеспячэння з платай за электраэнергію па ўстаноўленых заканадаўствам тарыфах).

Прадугледжана, што налічэнне платы па субсідзіруемых тарыфах будзе праводзіцца адносна жылых памяшканняў, у якіх грамадзяне зарэгістраваны па месцы жыхарства.

Таксама прадугледжваецца пераразлік платы за ЖКП у выпадку няправільнага прымянення арганізацыяй тарыфу на жыллёва-камунальную паслугу з моманту выяўлення гэтага факта (парушэння). Але пераразлік можа быць не большы чым за тры месяцы, калі ён вядзе да налічэння платы за ЖКП за папярэднія перыяды.

Парадак зняцця паказанняў прыбораў індывідуальнага ўліку расходу камунальных паслуг дапоўнены выпадкам падключэння да сістэмы дыстанцыйнага здыму паказанняў.

Прадугледжваецца для жыльцоў па дагаворах найму жылога памяшкання ў інтэрнаце парадак платы за тэхнічнае абслугоўванне ліфта, санітарнае ўтрыманне дапаможных памяшканняў, пакрыццё расходаў на электраэнергію, спажытую на асвятленне дапаможных памяшканняў і работу абсталявання, у тым ліку ліфтаў, зыходзячы з колькасці грамадзян, пазначаных у такіх дагаворах.

БЕЛТА