У Клічаве пройдзе рэгіянальны фестываль традыцыйных культур малых гарадоў «Кліч над Вольсай»

У суботу, 31 мая, чацвёрты раз у Клічаве правядуць рэгіянальны фестываль традыцыйных культур малых гарадоў «Кліч над Вольсай». У яркім святочным мерапрыемстве прымуць удзел прадстаўнікі творчых калектываў Магілёўскай, Мінскай і Гомельскіх абласцей, а таксама Дарагабужскага і Шумяцкага раёнаў Расіі.

Галоўны спецыяліст сектара ідэалагічнай работы Клічаўскага райвыканкама Алена Мачэкіна расказала:

- Магілёўшчыну будуць прадстаўляць выканаўцы ў розных жанрах з Асіповіцкага, Глускага, Кіраўскага і Клічаўскага раёнаў. Запланавана разнастайная і насычаная культурная праграма: народныя, апрацаваныя і стылізаваныя ў народнай манеры вакальныя творы, дэфіле ў традыцыйных этнаграфічных касцюмах, народна-бытавыя танцы. Народныя таленты не толькі прадэманструюць свае здольнасці, але і навучаць танцаваць усіх ахвочых.

Яшчэ да ўрачыстага адкрыцця фестывалю на Цэнтральнай плошчы горада пачнуць працаваць тэматычныя пляцоўкі: «Клічаў.ART», майстар-класы па дэкаратыўна-прыкладным мастацтве, выставы-продажы вырабаў традыцыйных рамёстваў удзельнікаў фестывалю і іншай сувенірнай прадукцыі, інтэрактыўныя пляцоўкі, фотазоны і многае іншае.

Можна будзе азнаёміцца з тэматычнымі экспазіцыямі мясцовай цэнтральнай бібліятэкі і краязнаўчага музея. Увогуле кожны госць фестывалю зможа знайсці занятак па душы.

Асаблівую ўвагу арганізатары надалі забаўкам для дзятвы: будзе абсталявана дзіцячая пляцоўка «гарэзны куток», для юных наведвальнікаў запрацуюць надзіманыя атракцыёны, ім прапануюць папулярныя аквагрым і дзіцячы лабірынт. А для аматараў актыўнага адпачынку Клічаўскі цэнтр дадатковай адукацыі дзяцей і моладзі падрыхтаваў спартыўна-гульнявую праграму.

Таксама пройдзе прэзентацыя традыцыйных напояў, будзе працаваць вулічнае кафэ.

Завершыцца фестываль цырымоніяй урачыстага ўзнагароджання ўдзельнікаў-пераможцаў і выступленнем творчага калектыву раённага Дома культуры.

Арганізатары запрашаюць усіх ахвочых стаць гасцямі, гледачамі фестывалю, каб цікава, разнастайна і з карысцю правесці свой выхадны і падтрымаць выканаўцаў апладысментамі і ўсмешкамі.

СБ