У Магілёўскай вобласці пасеяна больш за 65 працэнтаў азімых збожжавых

Задзел на вясну

Палявы сезон працягваецца - аграрыі рэгіёну ўбіраюць кукурузу на зерне і сілас, ужо выканана палова задання. Набліжаюцца да экватара з цукровым бураком, накапаўшы 200 тысяч тон, на фінішную прамую выйшлі па ўборцы бульбы, як і гародніны ў цэлым, — засталося крыху больш за 15 працэнтаў плошчаў. І, вядома ж, у вобласці актыўна рыхтуюць задзел будучага ўраджаю: на раніцу 3 кастрычніка 151 тысяча гектараў засеяна азімымі збожжавымі - 66 працэнтаў ад задання. А ў Крычаўскім раёне азімымі збожжавымі ўжо засеялі 72 працэнты запланаваных плошчаў — 5,5 тысячы гектараў.

28‑гадоваму механізатару ААТ «Крычаўрайаграпрамтэхзаб» Сяргею Дурбажэву давяраюць самыя адказныя ўчасткі. Хлопец - патомны хлебароб, не падвядзе:

- З дзяцінства мая прафесія падабалася. Мэтанакіравана адвучыўся на механізатара ў крычаўскім каледжы, затым працаваў у родным раёне. А калі стаў бацькам, яшчэ больш стараннасці ў справе з'явілася - хачу, каб дзеці мной ганарыліся!

Бацька і старэйшы брат Сяргея ў свой час таксама працавалі трактарыстамі. Сам ён рыхтуецца ў лістападзе стаць бацькам ужо другі раз.

- Калі народзіцца хлопчык, цэлая дынастыя можа ў будучыні атрымацца, - цешыцца Дурбажаў і зноў садзіцца ў кабіну - трэба спяшацца, пакуль надвор'е.

Малады механізатар працуе ў пары з перадавіком Аляксандрам Арловым. Аляксандр Пятровіч ужо год як пенсіянер, але ўсё роўна ў страі:

- Бывала, так закручуся на працы і выб'юся з сілы, што чакаю пенсію як выратаванне. Думаў, атрымаю пасведчанне - адразу на заслужаны адпачынак. Але не тут было - прыкіпеў да справы. Настолькі хвалююся за ўраджай, каб краіна з хлебам была, не магу сысці.

Дурбажаў рыхліць зямлю бараной, рыхтуе поле пад пасеў, а Арлоў высейвае пшаніцу. За дзень могуць больш за 30 гектараў накруціць. Пасля доўгачаканага дажджу працаваць стала прыемней. Два месяцы засухі былі невыноснымі, успамінае Аляксандр Пятровіч, - пыл у кабіне, здаецца, да гэтага часу стаіць.

- Да моладзі з парадамі асабліва не лезу, але часам дзялюся прафесійнымі хітрасцямі. Напрыклад, падказваю, каб лепш рыхтавалі краі для развароту, тады агрэгаты не будуць ламацца. Хлопцы - малайцы, стараюцца. Годная змена падрасла!

На палях ААТ «Крычаўрайаграпрамтэхзаб» у падрыхтоўцы глебы пад пасеў задзейнічана тры адзінкі тэхнікі. Чатыры машыны прыбіраюць кукурузу, яшчэ па дзве - на нарыхтоўцы кармоў і на пасеве. Гаспадарка засеяла азімымі збожжавымі 600 гектараў, перасягнуўшы планку 60 працэнтаў ад задання. Жыта, ячмень, але львіная доля ў структуры пасяўных плошчаў пад азімыя ў гаспадарцы належыць пшаніцы.

СБ