У Магілёўскай вобласці прыбрана больш за 40% плошчаў збожжавых

У Магілёўскай вобласці прыбрана больш за 40% плошчаў збожжавых. Пра гэта паведаміла начальнік аддзела раслінаводства камітэта па сельскай гаспадарцы і харчаванні Магілёўскага аблвыканкама Лілія Гулінская.

«На сённяшні дзень у Магілёўскай вобласці збожжавыя прыбраны з 43% плошчаў – гэта амаль 141 тыс. га. Намалочана 434,5 тыс. т пры сярэдняй ураджайнасці 30,8 ц/га», – адзначыла Лілія Гулінская.

Завяршаецца ў рэгіёне ўборка азімага рапсу – ужо прыбрана 98% плошчаў. Намалочана 78,3 тыс. т пры сярэдняй ураджайнасці 19,1 ц/га.

«Уборачная кампанія ў рэгіёне ідзе актыўнымі тэмпамі, у працу ўключаны ўсе гаспадаркі. Усе імкнуцца правесці ўборку ўраджаю своечасова, у адпаведнасці з тэхналогіямі і без страт», – падкрэсліла Лілія Гулінская.

Як расказаў старшыня абласной прафсаюзнай арганізацыі Беларускага прафсаюза работнікаў АПК Аляксей Рымша, на дадзены момант у Магілёўскай вобласці 52 экіпажы перасягнулі тысячную мяжу. З іх 1 сямейны і 7 моладзевых. 2 тыс. т збожжа намалаціў адзін экіпаж у рэгіёне. Сярод вадзіцеляў-тысячнікаў 84 чалавекі, з іх 10 – прадстаўнікі моладзі. 2 тыс. т перавезла 7 кіроўцаў.

БЕЛТА