У Магілёўскай вобласці створаны 731 участак для галасавання

На тэрыторыі Магілёўскай вобласці створаны 731 участак для галасавання па выбарах Прэзідэнта Рэспублікі Беларусь. Пра гэта паведаміў старшыня Магілёўскай абласной камісіі Валерый Берастаў.

Больш за ўсё ўчасткаў – 86 – утворана на тэрыторыі Ленінскага раёна горада Магілёва, 65 – Кастрычніцкага. Вялікая колькасць участкаў створана і ў другім буйным горадзе рэгіёна – Бабруйску. Тут на тэрыторыі Ленінскага і Першамайскага раёнаў будзе размяшчацца 49 і 55 участкаў адпаведна. «Такія рашэнні былі прынятыя на пасяджэннях раённых выканаўчых камітэтаў і мясцовых адміністрацый па ўзгадненні з тэрытарыяльнымі камісіямі. Улічваліся і патрабаванні выбарчага заканадаўства, згодна з якім колькасць выбаршчыкаў на адным участку не павінна перавышаць 3 тыс. чалавек», – адзначыў суразмоўца.

Таксама ў рэгіёне з 731 участка 34 створаны ў арганізацыях аховы здароўя, якія аказваюць медыцынскую дапамогу ў стацыянарных умовах. Асаблівасць іх працы будзе заключацца ў тым, што спісы выбаршчыкаў там вывесяць не за 15 дзён да даты выбараў, а за два дні.

Паводле слоў Валерыя Берастава, на дадзены момант у Магілёўскай вобласці ідзе вылучэнне прадстаўнікоў у склад участковых камісій па выбарах. Вылучаць сваіх прадстаўнікоў у склад участковых камісій маюць права працоўныя калектывы, палітычныя партыі і іншыя грамадскія аб’яднанні, а таксама грамадзяне шляхам падачы заявы. Згодна з каляндарным планам утварэнне ўчастковых камісій павінна завяршыцца не пазней за 45 дзён да выбараў, гэта значыць да 24 чэрвеня 2020 года.