У Магілёўскай вобласці ўборку асноўнай масы збожжавых плануюць завяршыць да 20 жніўня

У Магілёўскай вобласці пры спрыяльным надвор'і ўборку асноўнай масы збожжавых плануюць завяршыць да 20 жніўня. Пра гэта расказала начальнік упраўлення інтэнсіфікацыі раслінаводства і меліярацыі камітэта па сельскай гаспадарцы і харчаванні Магілёўскага аблвыканкама Лілія Гулінская.

Яна падкрэсліла:

- Па меры гатоўнасці з палёў прыбіраюцца ўсе азімыя і яравыя культуры. Калі надвор'е будзе садзейнічаць, то Магілёўская вобласць пастараецца завяршыць уборку асноўнай масы збожжавых ужо да 20 жніўня. Час напружаны: адзін на аднаго наслойваюцца розныя віды сельскагаспадарчых работ, але аграрыі разумеюць значнасць гэтага перыяду і стараюцца ўкласціся ў належны тэрмін.

У Магілёўскай вобласці на 12 жніўня ўбрана 47 працэнтаў плошчаў збожжавых і зернебабовых культур, або амаль 164 тысячы гектар. Намалочана звыш 532 тысяч тон збожжа пры сярэдняй ураджайнасці 32,5 цэнтнера з гектара — гэты паказчык большы за леташні на 7,2 цэнтнера з гектара.

Сёлета добрую ўраджайнасць паказвае азімая пшаніца — 36 цэнтнераў з гектара (на 7,1 пункта вышэй за леташні паказчык), жыта — 25,8 цэнтнера з гектара (вышэй на 6,8). Цешыць і авёс — 30,7 цэнтнера з гектара, ці на 6,7 вышэй за леташні. У асобных раёнах гэтай культуры збіраюць нават больш за 50 цэнтнераў з гектара.

Сярод рэгіёнаў у лідэрах па тэмпах уборкі і ўраджайнасці Кіраўскі раён - убрана 70 працэнтаў пасеваў пры сярэдняй ураджайнасці збожжавых 44,5 цэнтнера з гектара, Клічаўскі - 60 працэнтаў пры 35 цэнтнерах з гектара і Бабруйскі - 59 працэнтаў пры 27,8 цэнтнера з гектара.

СБ