У Магілёўскай вобласці зарэгістравана 217 пацверджаных выпадкаў каранавіруснай інфекцыі

Паводле дадных на 17 красавіка ў Магілёўскай вобласці зарэгістравана 217 пацверджаных выпадкаў каранавіруснай інфекцыі. Пра гэта паведаміў сёння міністр аховы здароўя Уладзімір Каранік падчас анлайн-канферэнцыі.

Што тычыцца сітуацыі ў Асіповіцкім раёне, яна цяпер стабільна кантралюемая, сказаў міністр. Там зарэгістравана 32 выпадкі заражэння, цяжкіх пацыентаў няма, з іх 12 – медыцынскія работнікі. Завоз адбыўся з боку аднаго з медработнікаў, які інфікаваўся ў бытавых умовах за межамі раёна, падкрэсліў Уладзімір Каранік.

У цэлым на раніцу пятніцы ў Беларусі зарэгістравана 4779 пацверджаных выпадкаў заражэння, праінфармаваў міністр. Больш за ўсё ў Мінску – 2308, далей ідзе Віцебская вобласць – 1282, Мінская вобласць – 588. У астатніх рэгіёнах выпадкаў істотна менш: Гомельская – 193, Брэсцкая – 112 і Гродзенская вобласць – 79. Выздаравелі і выпісаны 342 пацыенты.

Пры гэтым Уладзімір Каранік адзначыў, што прафілактычныя правілы павінен выконваць кожны жыхар краіны, незалежна ад статыстыкі распаўсюджвання COVID-19 у канкрэтным раёне. «Рэкамендацыі мер бяспекі, мер асабістай гігіены датычацца абсалютна ўсіх. Усё роўна, ёсць хворыя ў гэтым раёне ці не. Гэтыя меры па сацыяльным дыстанцыраванні, выкананні элементарных норм асабістай бяспекі тычацца ўсіх без выключэння», – канстатаваў міністр.