RU BY EN 中文
Twitter Instagram

У Магілёўскай вобласці жніво ідзе з папраўкай на палегліцу пасля стыхіі

Тактычная перазагрузка

Ад урагану на Магілёўшчыне пацярпела каля 15 тысяч гектараў зерневых. Пры агульнай плошчы амаль 340 тысяч гектараў лічба параўнальна невялікая, але прыбраць ураджай без страт - аксіёма для любога гаспадара. Калі жніво ў разгары, а тэрміны розных палявых работ сёлета супалі, аграрыям даводзіцца прымяняць перазагрузку ў рэжыме «тут і цяпер» з улікам рэсурсаў, прыбытковасці і надвор'я.

З галоўным аграномам ААТ «Агракамбінат «Усход» Магілёўскага раёна Наталляй Кібісавай праехалі ўздоўж палёў, дзе стыхіяй пакруціла каласы і паклала ўчасткі з азімай пшаніцай і трыцікале. Спецыяліст узгадвае, як непагадзь заспела яе на кантролі працэсу ўборкі і ёй пачалі тэлефанаваць механізатары з іншага ўчастка і расказваць, што падаюць дрэвы і лётае шыфер:

- У нас да крайніх кропак сельгасугоддзяў пад 40 кіламетраў, стыхія прайшлася па палях у быхаўскім кірунку. Падлічылі, што ўраган пашкодзіў 150 гектараў збожжавых - дзесятую частку ўсёй збажыны, дзесьці ад двух да пяці гектараў на асобных палях. Гэта яшчэ не бяда - будзем прыбіраць сцеблапад'ёмнікамі. А вось калі прыехалі на рапсавае поле, дзе на 150 гектарах пераламаныя сцеблы і адбітыя струкі, слёзы навярнуліся: нічога не застаецца, як заворваць і засяваць азімымі. Што казаць, калі побач у лесе дрэвы з коранем вырывала.

Камбайнер Мікалай Краўцоў чакае адмашкі агранома: як толькі вільгацямер пакажа гатоўнасць поля да ўборкі — можна пачынаць. У Мікалая гэта ўжо пятнаццатая ўборачная, і прыроднымі катаклізмамі яго не напалохаеш.

- Надвор'е пад хлебаробаў не падладжваецца. Гэта нам нельга схіліць. Калі тэхніку не дагледзіш па-гаспадарску, вось тады недаравальна ўраджай страціць. Майму камбайну пяць гадоў, я з раніцы кожную гайку пераправеру. Бачыў па тэлевізары, як Прэзідэнт нядаўна сказаў, што негатоўнасць камбайна або сушылкі - гэта злачынства. Абсалютна згодзен! Такі ўраджай у палях стаіць - наш дабрабыт.

Камбайнер паказвае замацаваныя на жняярцы сцеблапад'ёмнікі - прыстасаванне ад палегліцы:

- Проста давядзецца знізіць хуткасць, каб прыбраць усё да апошняга каласка. Палі ў нас расцягнуты аж да Быхаўскага раёна. Каб не ганяць марна тэхніку, пакідаем яе начаваць у полі, ёсць вартаўнік. З рамонтам таксама знайшлі эканомнае рашэнне: ёсць свая тэхнічная «хуткая дапамога», слесары з абсталяваннем прыязджаюць прама ў палі.

Наталля Кібісава пацвярджае, што ва ўмовах, калі адначасова саспелі азімыя і яравыя, ідзе ўкос траў і падрыхтоўка глебы пад сяўбу, лагістыка выходзіць на першы план:

- Калі Прэзідэнт на днях наведваў палі ў Мінскім раёне, якраз на гэта і звяртаў увагу: трэба паглядзець з тактыкай, зараз ужо не па стратэгіі пытанне. Таму з вечара аб'язджаем сельгасугоддзі, ацэньваем фазу паспявання, лічым кіламетраж і ў шэсць раніцы збіраемся ўсё на планёрку, каб раздаць кожнаму заданне.

Ураджай збожжавых сёлета сапраўды лепшы. І ў нас кожнае зярнятка на вагу золата: на наш свінакомплекс і пагалоўе буйной рагатай жывёлы кожны дзень патрабуецца 40 тон камбікорму.

На пытанне, як далікатнай жанчыне ўдаецца кіраваць калектывам механізатараў, Наталля адказвае, што многіх з іх яна ведае са школы:

- Мой бацька ўсё жыццё прапрацаваў аграномам, любіла з ім ездзіць па палях, па яго слядах пайшла ў сельгасакадэмію. Я люблю справу, якую выбрала, тут неабходна заўсёды вучыцца: езджу на семінары, чытаю, вывучаю вопыт гаспадарак-флагманаў. Спрабавалі кулісныя пасевы, сёлета люцэрну сеялі ў чыстым выглядзе, а на наступны год паэксперыментуем з сояй. Будзем сеяць азімы рапс беларускага гатунку, суадносіны «кошт - якасць» аптымальныя.

Наталля Кібісава прызнаецца: зараз працуе без выходных, як і механізатары, у палях - да дзевяці вечара. Муж і двое дзяцей, кажа, у гарачую пару жніва імкнуцца падтрымаць і разумеюць, якая гэтая важная справа - праца хлебаробаў. Галоўны аграном агракамбіната «Усход» падкрэслівае, што на гэтай уборачнай ім дапамога не спатрэбіцца - з кадрамі пытанне вырашылі, некаторыя механізатары вярнуліся працаваць у гаспадарку, зарплата ў сезон да пяці тысяч рублёў, жыллё работнікам гатовы прадаставіць:

- Усе нашы фінансавыя і працоўныя выдаткі цяпер у палях. На селектарнай нарадзе Прэзідэнт дакладна вызначыў галоўныя арыенціры для хлебаробаў: «Патрэбны высокая арганізацыя работ, добрая матывацыя аграрыяў і жалезная дысцыпліна». Вось гэтым усталёўкам і вынікаем.

ПРАМАЯ МОВА

Начальнік упраўлення камітэта па сельскай гаспадарцы і харчаванні Магілёўскага аблвыканкама Лілія Гулінская:

- У Магілёўскай вобласці больш за ўсё пацярпелі пасевы ў Горацкім, Кіраўскім, Магілёўскім, Клімавіцкім, Краснапольскім і Чавускім раёнах. Уборка гэтых участкаў будзе весціся з дапамогай сцеблапад'ёмнікаў. Але, як адзначыў Кіраўнік дзяржавы, інспектуючы ход уборачнай у Мінскім раёне, дзейнічаць аграрыям трэба разумна: і палегліцу ўбраць, і вырашчанае на высокаўраджайных палях не страціць. Таму кожны кіраўнік па-гаспадарску зараз павінен вызначыцца з тым, на што найперш кінуць асноўныя сілы. Што да збожжавых, то ў вобласці ўбрана 35 працэнтаў плошчаў, намалочана больш за 300 тысяч тон. Азімы рапс убраны з 90 працэнтаў палёў, да экватара набліжаецца церабленне лёну, працягваецца корманарыхтоўка і падрыхтоўка глебы да сяўбы азімага рапсу.

 СБ

Пры выкарыстанні матэрыялаў актыўная гіперспасылка на mogilev-region.gov.by абавязковая