У Магілёўскай вобласці знізяць выдаткі на зімовае ўтрыманне аўтадарог за кошт новых тэхналогій

У Магілёўскай вобласці плануецца рэалізаваць інавацыйны праект, накіраваны на павышэнне бяспекі дарожнага руху і зніжэнне выдаткаў па зімовым стане аўтадарог на аснове ўкаранення новых тэхналогій. Пра гэта ішла размова на сустрэчы старшыні Дзяржаўнага камітэта па навуцы і тэхналогіях Аляксандра Шуміліна з працоўным калектывам РУП «Магілёўаўтадар», як паведамілі ў прэс-службе ДКНТ.

Праект рэалізуюць на высакахуткасных платных магістральных участках дарог першай тэхнічнай катэгорыі агульнай працягласцю больш за 170 км, стан якіх патрабуе асаблівай увагі. Гэта трасы М4 Мінск–Магілёў і М5/Е271 Мінск–Гомель. Праект будзе выконвацца па дзяржаўнай праграме інавацыйнага развіцця Беларусі на 2021–2025 гады.

Зараз на тэрыторыі краіны выкарыстоўваюць метады, заснаваныя на ўнясенні цвёрдых супрацьгалалёдных рэагентаў у выглядзе солі і пясчана-салянай сумесі. Як адзначыў Аляксандр Шумілін, яны не заўсёды эфектыўныя і валодаюць шэрагам сур’ёзных недахопаў, якія значна пагаршаюць бяспеку дарожнага руху і зніжаюць хуткасны рэжым. У той жа час прапанаваная інавацыйная тэхналогія прымянення вадкіх рэагентаў мае цэлы шэраг пераваг, у тым ліку эканамічных: рэагенты на аснове соляў хларыду натрыю з’яўляюцца адходамі вытворчасці ААТ «Беларуськалій» і маюць нізкі кошт. Акрамя таго, гэтая тэхналогія значна знізіць экалагічную нагрузку на прыроду.

Пры ўжыванні тэхналогій, заснаваных на выкарыстанні вадкіх супрацьгалалёдных рэагентаў, мяркуецца задзейнічаць універсальную тэхніку беларускай вытворчасці, у тым ліку на базе СП ЗАТ «МАЗ-МАН». У праекце таксама прадугледжана эксплуатацыя інавацыйнага вымяральнага абсталявання, якое ўстанаўліваецца на аўтамабіль і дазваляе ў рэальным часе бескантактавым спосабам вымяраць тэмпературу і стан пакрыцця па ўсёй працягласці дарогі, а таксама каэфіцыент счаплення. «Падобнае абсталяванне прынясе эфект пры зімовым утрыманні дарог. Яго таксама можна будзе выкарыстоўваць у інтэлектуальнай транспартнай сістэме для кіравання хуткаснымі рэжымамі, уносіць карэкціроўкі ў нормы размеркавання рэагентаў на асобна ўзятых участках дарогі. У далейшым можна будзе распаўсюдзіць атрыманыя вынікі на іншыя рэгіёны краіны», – расказаў Аляксандр Шумілін.

РУП «Магілёўаўтадар» створана ў 1998 годзе. У яго гаспадарчым вядзенні знаходзіцца больш за 2,5 тыс. км рэспубліканскіх дарог, з якіх 174 км –дарогі І тэхнічнай катэгорыі. У складзе прадпрыемства дзевяць філіялаў, колькасць работнікаў – каля 800 чалавек.

БЕЛТА