У Магілёве адкрылі абноўлены адміністрацыйны будынак аддзела ўнутраных спраў адміністрацыі Ленінскага раёна

У абласным цэнтры сёння ўрачыста адкрылі абноўлены адміністрацыйны будынак аддзела ўнутраных спраў адміністрацыі Ленінскага раёна горада Магілёва. З гэтага моманту ўсе службы райаддзела будуць знаходзіцца ў адным месцы, што створана, у першую чаргу, для зручнасці грамадзян, перадае карэспандэнт сайта.

Так, з Пажарнага завулка, 4 сюды перанесена аддзяленне па грамадзянстве і міграцыі. Гэта ж тычыцца крымінальна-выканаўчай інспекцыі, якая раней размяшчалася на Ціміразеўскай, 36.

Абноўлены будынак стаў больш прасторным за кошт прыбудовы трэцяга паверха. Тут размешчаны аператыўныя кабінеты, абсталяваныя сучаснай тэхнікай і мэбляй, таксама знаходзяцца навучальныя класы для патрульна-паставой службы і ўчастковых інспектараў міліцыі. Апошнія створаны для ўдасканалення прафесійнага майстэрства супрацоўнікаў. Таму заняткі па розных напрамках службовай дзейнасці будуць праводзіцца на рэгулярнай аснове.

Акрамя таго, на базе Ленінскага РАУС цяпер знаходзяцца спецыяльныя памяшканні аператыўна-сітуацыйнага штаба на выпадак розных надзвычайных здарэнняў, дзе можна ў аўтаномным рэжыме кантраляваць тыя ці іншыя сітуацыі. Для гэтага ўстаноўлены інтэрактыўная дошка, тэлевізары, абсталяваныя працоўныя месцы з камп’ютарнай тэхнікай.

У актавай зале, дзе таксама маюць намер праводзіць інструктажы пры заступленні на службу сутачнага ўбору, размешчаны праектар і тэлевізар. З’явілася трэнажорная зала. У будынку створаны пакой гісторыі, экспанаты для якой перадаюць ветэраны Ленінскага РАУС, простыя грамадзяне. У планах праводзіць тут розныя рытуалы: уручэнне пагонаў, дзяржаўных узнагарод і інш. На тэрыторыі, прылеглай да райаддзела, размясціліся прасторныя гаражы для службовага транспарту. Усюды ўстаноўлена сістэма відэаназірання.

Гісторыя аддзела ўнутраных спраў Ленінскага раёна горада Магілёва бярэ свой пачатак са студзеня 1963 года. І сёння, нягледзячы на неаднаразовую рэарганізацыю, змену месцаў дыслакацыі, асабісты склад РАУС вяртаецца на сваё гістарычнае месца, падкрэсліў падчас адкрыцця першы намеснік міністра МУС генерал-маёр міліцыі Іван Падгурскі. Ён заўважыў, што кіраўніком дзяржавы, кіраўніцтвам Міністэрства ўнутраных спраў, органамі выканаўчай улады надаецца вялікая ўвага стварэнню камфортных умоў для нясення службы праваахоўнымі органамі. Зыходзячы са спецыфікі дзейнасці, супрацоўнікі міліцыі праводзяць большую частку часу на працы. Таму будынак РАУС можна без перабольшвання назваць другім домам.

«Сёння Ленінскі РАУС горада Магілёва цалкам адпавядае патрабаванням часу, – адзначыў Іван Падгурскі. – Ад яго супрацоўнікаў патрабуецца толькі адно: заставацца прафесіяналамі сваёй справы і імкнуцца да таго, каб у грамадстве панавалі парадак, спакой і бяспека. Удасканаленая матэрыяльна-тэхнічная база дазволіць палепшыць якасць і эфектыўнасць выконваемых задач». Генерал-маёр пажадаў асабістаму складу райаддзела прафесійнага росту, поспехаў у службе, шчасця, здароўя і ўручыў у якасці падарунка ад МУС ключы ад аўтамабіля Geely Atlas.

У сваю чаргу старшыня Магілёўскага аблвыканкама Уладзімір Даманеўскі звярнуў увагу на асаблівую значнасць Ленінскага раёна горада Магілёва для Прыдняпроўскага краю. «Менавіта ён найбольш наведваецца дэлегацыямі з розных краін, – сказаў кіраўнік рэгіёна. – А каб госці і нашы грамадзяне адчувалі сябе камфортна, трэба падтрымліваць адпаведны правапарадак. З гэтай задачай ваша падраздзяленне і абласное ўпраўленне ў цэлым спраўляюцца з гонарам і годнасцю». Разам з сімвалічным ключом ад абноўленага будынка Уладзімір Даманеўскі перадаў начальніку Ленінскага РАУС горада Магілёва Аляксею Шчарбакову сертыфікат на аргтэхніку.

«Увод у эксплуатацыю будынка – сапраўдны падарунак для асабістага складу РАУС, таму важна, каб яно ўвасабляла бяспеку ў раёне, а кожны чалавек, які прыйшоў сюды, адчуваў, што яго праблема не застанецца без належнай увагі, – канстатаваў начальнік УУС Магілёўскага аблвыканкама палкоўнік міліцыі Ігар Шчарбачэня. – Упэўнены: новыя ўмовы спрыяльна адаб’юцца на выніках працы па забеспячэнні парадку, бо гэта заўсёды матывуе да больш сур’ёзнага і якаснага падыходу ў службе». Ад абласнога ўпраўлення ўнутраных спраў аўтапарк райаддзела папоўніў Geely Emgrand.