У Магілёве артысты дзіцячай школы мастацтваў пакажуць спектакль у абласным тэатры лялек

У тэатральнай пастаноўцы будзе задзейнічана больш за 70 юных талентаў - артысты ўзорнай тэатральнай студыі «У кропку!», узорнага тэатра «Рэха», тэатра гульні «Апельсін» і ўзорнага харэаграфічнага ансамбля «Дывертысмент». Усе гэтыя калектывы складаюцца з выхаванцаў дзіцячай школы мастацтваў і традыцыйна дораць гледачу сваю творчасць.

Казка-тэлепартацыя «Таямніца краіны Гармоніі» створана па творы Вольгі Бяловай - члена Саюза пісьменнікаў Беларусі, лаўрэата міжнародных літаратурных конкурсаў і кіраўніка тэатральнай студыі «У кропку!». У аснове сюжэту - гісторыя, якая адбылася ў Магілёве. Яна апавядае пра маленькую жоўтую фарбу, якая стала прычынай тэлепартацыі хлопчыка Савелія і яго аднакласнікаў у дзіўную краіну Гармонію. Ці варта казаць, што ў далёкай казачнай дзяржаве сяброў чакалі неверагодныя прыгоды.

Па словах Ірыны Аўдзевіч, школа мастацтваў і тэатр лялек цесна супрацоўнічаюць ужо некалькі гадоў. Толькі ў найбліжэйшыя два месяцы выхаванцы ўстановы адукацыі пакажуць на вялікай сцэне чатыры свае пастаноўкі. «Тэатральнае аддзяленне нашай школы мае даўнія традыцыі і трывалую адукацыйную базу, - адзначыла яна. - Так, падрыхтоўку юных артыстаў тут пачалі весці з 1989 года. Сёння па гэтым профілі ў школе навучаюцца больш за 100 чалавек ва ўзросце ад 6 да 14 гадоў».

З году ў год пастаноўкі выхаванцаў карыстаюцца папулярнасцю ў гледача, а таксама адзначаюцца ўзнагародамі на розных конкурсах і фестывалях. А ў 2022 годзе творчы праект Магілёўскай дзіцячай школы мастацтваў нумар 1 атрымаў грант Прэзідэнта, вынікам яго рэалізацыі стаў спектакль па паэме Мікалая Гусоўскага «Песня пра зубра».