У Магілёве прайшоў абласны форум удзельнікаў VI Усебеларускага народнага сходу

Напярэдадні правядзення VI Усебеларускага народнага сходу ў Магілёве адбыўся абласны форум дэлегатаў ад Прыдняпроўскага краю.

У мерапрыемстве ўзялі ўдзел: Кіраўнік Адміністрацыі Прэзідэнта Рэспублікі Беларусь Ігар Сяргеенка, намеснік Прэм'ер-міністра Рэспублікі Беларусь Анатоль Сівак, старшыня Магілёўскага аблвыканкама Леанід Заяц, памочнік Прэзідэнта Рэспублікі Беларусь – інспектар па Магілёўскай вобласці Леанід Мартынюк, Кіраўнік Апарату Савета Міністраў Рэспублікі Беларусь Канстанцін Бурак, Міністр працы і сацыяльнай абароны Рэспублікі Беларусь Ірына Касцевіч, Міністр архітэктуры і будаўніцтва Рэспублікі Беларусь Руслан Пархамовіч, Міністр жыллёва-камунальнай гаспадаркі Рэспублікі Беларусь Андрэй Хмель, Міністр эканомікі Рэспублікі Беларусь Аляксандр Чарвякоў, а таксама члены Савета Рэспублікі, дэпутаты Палаты прадстаўнікоў Нацыянальнага сходу Рэспублікі Беларусь, кіраўнікі грамадскіх аб'яднанняў і інш.

У прывітальным слове старшыня Магілёўскага аблвыканкама Леанід Заяц адзначыў, што напярэдадні Усебеларускага народнага сходу па ўсёй краіне праз дыялогавыя пляцоўкі і грамадскія прыёмныя было арганізавана абмеркаванне далейшай стратэгіі развіцця краіны. Сустрэчы атрымаліся канструктыўнымі, і многія прапановы будуць пакладзены ў аснову рашэнняў агульнанацыянальнага форуму.

Па словах кіраўніка рэгіёна, асноўным пасылам бягучай пяцігодкі стане адзінства ўсяго грамадства. Галоўнай жа мэтай – дабрабыт людзей, павышэнне ўзроўню заработнай платы, забеспячэнне росту эканамічнага развіцця прадпрыемстваў вобласці.

«Калі людзі адзіныя, прасцей вырашаць усе праблемы і пытанні, працаваць на карысць рэгіёна і краіны. Для Магілёўшчыны вельмі важна сёння дасягнуць тых эканамічных значэнняў, якія забяспечылі б дабрабыт нашых людзей. Свае рэзервы мы бачым у прамысловасці, сельскай гаспадарцы. Мы робім стаўку на прыярытэтныя нашы напрамкі, якія ляжаць у аснове эканамічнага развіцця. Разглядаем магчымасці па падтрымцы паўднёва-ўсходняй тэрыторыі. І гэтую пяцігодку мы плануем завяршыць з добрым вынікам», – адзначыў Леанід Заяц.

Кіраўнік Адміністрацыі Прэзідэнта Ігар Сяргеенка падчас абласнога сходу падкрэсліў, што жыццё беларусаў пасля рэспубліканскага форуму адназначна зменіцца. Яна стане лепшай і больш якаснай. Таму што ў аснову ўсёй сацыяльна-эканамічнай палітыкі пакладзены інтарэсы простага чалавека. Гэта пытанні, якія тычацца адукацыі, аховы здароўя, развіцця інтэлектуальных магчымасцей, даходаў.

«Падрыхтаваная праграма – усёабдымная. Гэта сур'ёзны дакумент, і сёння прадстаўнікі цэнтральных органаў улады праінфармавалі прысутных аб напрамках развіцця, у тым ліку з акцэнтам на перспектывы развіцця Магілёўскай вобласці. Хацеў бы адзначыць, што Магілёўшчына на працягу апошніх гадоў дэманструе поспехі ў эканоміцы, развіцці сістэмы аховы здароўя, матэрыяльна-тэхнічнай базы. Сёння гаворка ішла аб захаванні агульначалавечых і гістарычных каштоўнасцей, пра тое, каб захаваць адзінства ў грамадстве, як далей развіваць палітычную сістэму нашай краіны», – сказаў Ігар Сяргеенка.

Кіраўнік Адміністрацыі Прэзідэнта падкрэсліў, што сёння прайшла зацікаўленая размова. Выступалі кіраўнікі прадпрыемстваў, педагогі, простыя працаўнікі вёскі, прамыслоўцы. Час праляцеў непрыкметна. Прагучалі асобна дзелавыя прапановы, якія патрабуюць рашэння на цэнтральным узроўні. Шэраг праблем – рэгіянальнага ўзроўню. У цэлым вельмі спадабаўся канструктывізм, дзелавітасць і патрыятычнасць аўдыторыі.

Галіна Гаўрыловіч, фота аўтара