У Магілёве прыступілі да будаўніцтва 2-й чаргі дарогі-дублёра вул. Якубоўскага – Загарадная шаша

У Магілёве прыступілі да будаўніцтва другой чаргі дарогі-дублёра вул. Якубоўскага – Загарадная шаша. Пра гэта паведаміў кіраўнік праекта ААТ «Дарожна-будаўнічы трэст № 3» Юрый Буякоў.

Зараз актыўна ідзе падрыхтоўчы этап, які пачаўся ў ліпені. На гэтым этапе ў пералік асноўных работ увайшлі ў ліку іншага знос будынкаў і збудаванняў, размешчаных на шляху пралягання будучай трасы. Так, па праекце будзе дэмантавана 987 гаражоў, гаспадары якіх у абавязковым парадку атрымаюць матэрыяльную кампенсацыю, і 14 прыватных домаўладанняў. Іх уладальнікам будзе прадастаўлена іншае жыллё – 9 кватэр і 5 дамоў разам з зямельнымі ўчасткамі, будаўніцтва якіх ужо вядзецца на тэрыторыі пасёлка Гарадшчына. Плануецца, што да канца лістапада людзі ўжо будуць святкаваць наваселле.

«Адносна гаражоў, іх знос уяўляе сабой няхуткі працэс: не заўсёды гаспадароў будынка можна знайсці: хтосьці пераехаў, хтосьці ўзводзіў пабудову без адпаведных дакументаў і рэгістрацыі, кагосьці ўжо няма ў жывых, – растлумачыў Юрый Буякоў. – Тым больш затрачваецца часу на ацэнку і пераафармленне гаража, каб пасля гаспадары атрымалі кампенсацыю за яго дэмантаж. Ужо ва ўстаноўленым законам парадку ўдалося знесці каля 45% гаражоў. Вядома ж, мы разлічвалі, што працэс будзе ісці хутчэй і завершыцца да канца кастрычніка, аднак пакуль ён трохі зацягваецца».

У найбліжэйшы час дарожнікі перанясуць інжынерныя сеткі, правядуць рэканструкцыю высакавольтных ліній электраперадачы, здымуць урадлівы пласт грунту, зробяць адсыпку зямельнага палатна і цалкам падрыхтуюць тэрыторыю да будаўніцтва. Падрыхтоўчы перыяд разлічаны на пяць месяцаў і павінен скончыцца ў лістападзе. Паралельна будаўнікі прыступілі да рэалізацыі асноўнага этапу, правядзенне якога разлічана да жніўня 2023 года. Аднак пры ўдалым ходзе работы рух могуць запусціць ужо да ліпеня наступнага года.

Працягласць другой чаргі дарогі-дублёра складзе больш за 1,76 км. Новая дарога будзе мець бетоннае пакрыццё і складацца з шасці палос руху. Сучасная інфраструктура аб’екта прадугледжвае транспартнае кальцо, з’езды, веласіпедныя і пешаходныя дарожкі, агароджы, прыпыначныя пункты і павільёны, вулічнае асвятленне, а таксама падземны пешаходны тунэль. У раёне пасёлка Гарадшчына да канца гэтага года будзе ўстаноўлены 4-метровы шумаахоўных экран працягласцю 1,46 км. Ён будзе ахоўваць жыхароў найбліжэйшых вуліц ад дарожнага пылу, шуму машын і загазаванасці.

Па словах Юрыя Буякова, трэцюю чаргу будаўніцтва плануецца пачаць у 2023 годзе. Гэты маштабны аб’ект Магілёву больш чым неабходны: злучэнне дзвюх частак абласнога цэнтра дазволіць людзям хутчэй дабірацца на працу, вырашыць праблему транспартнай загрузкі цэнтральнай часткі горада – праспекта Міру, вуліц Першамайскай, Касманаўтаў і Якубоўскага. Дарога-дублёр злучыць вул. Касманаўтаў з вул. Пысіна і жылымі мікрараёнамі «Спадарожнік» з насельніцтвам 15 тыс. чалавек і «Спадарожнік-2», дзе ў найбліжэйшы час будзе пражываць 3 тыс. насельніцтва. Гэта створыць вялікую зручнасць для магілёўцаў і ўсіх уладальнікаў транспарту. Адкрыццё дарогі-дублёра стане працягам працы па развіцці транспартнай інфраструктуры горада, якая пачалася яшчэ ў 2013 годзе.

Дарэчы, адкрыццё першай чаргі дарогі-дублёра вул. Якубоўскага – Загарадная шаша адбылося год таму, 17 верасня, у Дзень народнага адзінства, і стала знамянальнай падзеяй для абласнога цэнтра. Дарога пачынаецца ад кальца вул. Касманаўтаў і выходзіць да вул. Пысіна. Яе працягласць 1,7 км, на тэрыторыі зроблены два пуцеправоды праз чыгуначныя веткі Магілёў – Гомель і Магілёў – Асіповічы. Таксама з’явіліся выхады і развязкі, пашырана кальцо па вул. Касманаўтаў, добраўпарадкавана прылеглая тэрыторыя. На першую чаргу будаўніцтва затрачана Br85 млн.

БЕЛТА