У Мсціславе сёлета пачнуць рэканструкцыю забудовы XII-XIV стагоддзяў на Замкавай гары

Рэканструкцыю забудовы XII-XIV стагоддзяў на Замкавай гары пачнуць сёлета ў Мсціславе. Пра гэта расказала начальнік аддзела ідэалагічнай работы, культуры і па справах моладзі Мсціслаўскага райвыканкама Наталля Біскуп.

Замкавая гара ў Мсціслаўлі з'яўляецца сапраўднай візітнай карткай не толькі раёна, але і ўсёй Магілёўскай вобласці. Гэта гісторыка-археалагічны помнік і музей пад адкрытым небам.

«У гэтым годзе плануем прыступіць да рэканструкцыі забудовы на Замкавай гары. Грашовыя сродкі для гэтых работ ужо атрыманы. Цяпер мы знаходзімся на этапе карэкціроўкі праектна-каштарыснай дакументацыі, паколькі яна распрацоўвалася яшчэ ў 2016 годзе і на сённяшні дзень страціла актуальнасць. Працуем у цесным звязку з Міністэрствам культуры - гэта ж гісторыка-археалагічны помнік, аб'ект не просты. Замоўцам выступае УКБ», - распавяла Наталля Біскуп.

Паводле яе слоў, карэкціроўкі і ўзгадненне ПСД зоймуць некалькі месяцаў, пасля гэтага на Замкавай гары пачнуцца рэканструкцыйныя работы. Яны будуць падзелены на некалькі этапаў. Да канца гэтага года плануецца завяршэнне будаўніча-мантажных работ аб'ектаў на Замкавай гары.

«Мы хочам захаваць трохпавярховасць вежы данжон. Трэба давесці да ладу Замкавую гару не толькі як помнік археалогіі, але і як месца, дзе збіраецца вялікая колькасць людзей на Рыцарскі фэст. У работах неабходна ўлічваць усе неабходныя патрабаванні бяспекі. Задача стаіць няпростая, але наша галоўная мэта - захаваць для цяперашняга пакалення і нашых нашчадкаў важны гістарычны аб'ект», - адзначыла яна.

БЕЛТА