У Слаўгарадскай цэнтральнай раённай бальніцы мадэрнізуюць сістэму ацяплення і гарачага водазабеспячэння

У Слаўгарадскай цэнтральнай раённай бальніцы мадэрнізуюць сістэму ацяплення і гарачага водазабеспячэння, ужыўшы альтэрнатыўную, энергазберагальную тэхналогію на аснове геліякалектараў. Пра гэта паведаміла намеснік начальніка ўпраўлення – начальнік вытворча-тэхнічнага аддзела Магілёўскага абласнога ўпраўлення па наглядзе за рацыянальным выкарыстаннем ТЭР Дэпартамента па энергаэфектыўнасці Святлана Заграбанец.

Праект рэалізуецца Слаўгарадскім УКП «Жылкамгас» сумесна з глабальным экалагічным фондам і раённай арганізацыяй грамадскага аб’яднання «Беларускі саюз жанчын». Ужо закуплены камплект абсталявання коштам $ 50 тыс. і пачаліся будаўніча-мантажныя работы. Завяршыць мадэрнізацыю маюць намер да 1 верасня бягучага года.     

Выкананыя работы дазволяць знізіць паліўна-энергетычныя выдаткі на падрыхтоўку гарачай вады на 90% ці 50 тут. За кошт укаранення сістэмы гарачага водазабеспячэння з ужываннем геліякалектараў штогадовае зніжэнне выкідаў парніковых газаў складзе 3 т., а папярэдняя эканомія раённага бюджэту–Br99,3 тыс. на год. На гэтыя сродкі Слаўгарадскае УКП «Жылкамгас» плануе мадэрнізаваць абсталяванне ў кацельна-цеплавой гаспадарцы.