У XXVI міжнародным пленэры па жывапісе прыме ўдзел 18 мастакоў з 7 краін

XXVI Міжнародны пленэр па жывапісе «Вобраз Радзімы ў выяўленчым мастацтве» адбудзецца 15–30 верасня. Пра гэта паведамілі ў Магілёўскім абласным мастацкім музеі імя П. В. Масленікава.

Як расказалі ва ўстанове культуры, пленэр праводзіцца штогод з 1996 года і прысвячаецца выдатным дзеячам культуры або значным падзеям у гісторыі Беларусі. У бягучым годзе пленэр прысвечаны Году гістарычнай памяці.

«За 25 гадоў правядзення пленэру ў ім прынялі ўдзел больш за 500 мастакоў з 37 краін свету. У XXVI міжнародным пленэры па жывапісе сваё майстэрства прадэманструе 18 мастакоў з 7 краін: Арменіі, Беларусі, Казахстана, Кітая, Кыргызстана, Расіі і Узбекістана. Прычым прадстаўнік Кыргызстана ўпершыню ўдзельнічае ў пленэры. Нароўні з заслужанымі майстрамі пэндзля ў пленэры ўдзельнічаюць зусім маладыя мастакі, што сімвалізуе пераемнасць пакаленняў, захаванне традыцый рэалізму ў жывапісе. Выяўленчае мастацтва настолькі аб’ядноўвае творцаў, што ў XXVI пленэры будуць прымаць удзел сямейныя пары, – адзначылі суразмоўцы».

Мастакі наведаюць значныя гістарычныя месцы Прыдняпроўскага краю. Гэта мемарыяльныя комплексы «Памяці спаленых вёсак Магілёўскай вобласці» і «Буйніцкае поле»; новы храм у гонар Раства Іаана Прадцечы; Быхаўскі замак; сінагога XVII стагоддзя; жаночы манастыр у гонар Ушэсця Гасподняга; помнік воінскай славы – Курган неўміручасці; Спаса-Праабражэнская царква; Трафімава крыніца; музей-клас Прэзідэнта Рэспублікі Беларусь Аляксандра Рыгоравіча Лукашэнкі.

Падвядзенне вынікаў і ўзнагароджанне ўдзельнікаў будзе праводзіцца па намінацыях: «Гістарычны партрэт», «Архітэктура – музыка ў камені», «Паэзія пейзажу», «Вехі слаўнага шляху».

Па выніках пленэру будзе прадстаўлены выставачны праект з дэманстрацыяй у Магілёўскім абласным мастацкім музеі імя П. В. Масленікава, у мастацкім музеі Бабруйска і ў Мінску.

Арганізатарам Міжнароднага пленэра па жывапісу «Вобраз Радзімы ў выяўленчым мастацтве» з’яўляецца Магілёўскі абласны выканаўчы камітэт.

Рэд.