Ва ўсіх раёнах Магілёўскай вобласці рыхтуецца вялікая праграма святкаванняў Дня народнага адзінства

Ва ўсіх раёнах Магілёўскай вобласці рыхтуецца вялікая праграма святкаванняў Дня народнага адзінства. Пра гэта паведамілі ў галоўным упраўленні ідэалагічнай работы і па справах моладзі Магілёўскага аблвыканкама.

Яшчэ задоўга да свята, якое ўпершыню праводзіцца ў нашай краіне 17 верасня, на Магілёўшчыне пачаліся вела-і аўтапрабегі, творчыя сустрэчы, выступленні самадзейных калектываў, гульнявыя праграмы, спаборніцтвы, флэшмобы, дыялогавыя пляцоўкі, круглыя сталы, патрыятычныя акцыі і акцыі па добраўпарадкаванні малой радзімы, тэматычныя кніжныя выставы, конкурсы дзіцячых эсэ і малюнкаў, адзіныя дні інфармавання і інш. Рэгіянальныя СМІ прысвяцілі гэтай тэматыцы спецыяльныя рубрыкі.

Разнастайныя мерапрыемствы запланаваны ў гарадах і раёнах Прыдняпроўскага краю непасрэдна 17 верасня. Так, шклаўчане адзінай калонай, пад адзіным дзяржаўным сцягам праедуць па населеных пунктах свайго рэгіёна, каб яшчэ раз паказаць сваё імкненне жыць мірна і шчасліва ў адзінай краіне. Дыялогавая пляцоўка пад дэвізам «Пра нашу Радзіму, пра нас» пройдзе ў раённа-краязнаўчым музеі. Да абмеркавання этапаў шляху станаўлення дзяржаўнасці плануецца далучыць вязняў фашысцкіх канцлагераў. Маладых спецыялістаў запросяць на сустрэчу са старшынёй райвыканкама. Хлопцы і дзяўчаты напрамую пагутараць з кіраўніком раёна, змогуць звярнуцца да яго з просьбамі, задаць пытанні і выказаць свае меркаванні. Актывісты грамадскіх арганізацый паўдзельнічаюць у закладцы новай алеі «Адзінства» ў гарадскім парку. Увечары ў Доме культуры запланаваны тэматычны канцэрт «Адзінства. Развіццё. Незалежнасць», дзе ва ўрачыстай абстаноўцы адзначаць шклаўчан, якія сваёй працай і справамі ўносяць дастойны ўклад у развіццё розных сфер жыцця.

Жыхары Бабруйскага раёна змогуць прыняць удзел у агітацыйным аўтамотапрабегу па памятных месцах Прыбярэзінскага краю. Таксама ў гэты дзень у школах адбудуцца ўрачыстыя лінейкі «Беларусь адзіная: адзінства, развіццё, незалежнасць».

Насычаным будзе святочны тыдзень у Магілёве. Ужо 14 верасня ў абласной бібліятэцы імя У. І. Леніна пройдзе сустрэча пісьменнікаў Магілёўскага аддзялення грамадскага аб’яднання «Саюз пісьменнікаў Беларусі» з творчай грамадскасцю горада на Дняпры «Хай мацнее штогод наш адзіны народ!». 15 верасня ў Палацы культуры вобласці моладзь сустрэнецца з вядомым паралімпійцам Аляксеем Талаем. Моладзевае спартыўна-патрыятычнае мерапрыемства «РаЗАм!» адбудзецца на пляцоўцы для гульні ў міні-гольф 16 верасня. У гэты ж дзень у Палацы культуры вобласці запланавана рэгіянальная ўрачыстасць, прымеркаваная да Дня народнага адзінства, а ў Магілёўскім гарадскім Цэнтры культуры і вольнага часу – канцэрт калектыву гарадской капэлы «Сіла – у нашым адзінстве!».

У сам дзень свята – 17 верасня – адкрыюць 1-ю чаргу будаўніцтва пуцеправода-дублёра вул. Якубоўскага і Загараднай шашы, а таксама памятны знак, прысвечаны Дню народнага адзінства, на пляцоўцы каля абласнога лячэбна-дыягнастычнага цэнтра. Апоўдні на плошчы Славы пройдзе ўзнагароджанне пераможцаў штогадовага гарадскога агляду-конкурсу на самую лепшую арганізацыю і нясенне Вахты памяці. У Музеі гісторыі Магілёва правядуць дзень адчыненых дзвярэй, пешую экскурсію «Магілёў–горад адзінства і згоды: шлях праз стагоддзі», у выставачнай зале прадставяць экспазіцыю работ членаў Беларускага саюза мастакоў «Вобразы натхнення».

Каля Беларускага дзяржаўнага ўніверсітэта харчовых і хімічных тэхналогій з’явіцца яблыневы сад, высаджаны студэнтамі ВНУ. Спартыўная пляцоўка Беларуска-Расійскага ўніверсітэта прыме таварыскую сустрэчу зборных каманд па міні-футболе БРУ і Магілёўскага дзяржаўнага ўніверсітэта імя А. А. Куляшова. На летняй пляцоўцы Магілёўскай дзіцячай школы мастацтваў №7 адбудзецца канцэрт «#МЫВМЕСТЕ». Завершыць дзень святочная праграма «Мы адзіныя!» каля лячэбна-дыягнастычнага цэнтра.

17 верасня – свята, якое павінна з’яднаць беларускае грамадства. Дата абрана ў гонар знакавай падзеі нашай гісторыі, калі ў 1939 годзе адбылося ўз’яднанне падзеленай нацыі. Але яднанне – гэта, вядома, не толькі адсылкі да мінулага. Сёння гэта дата яшчэ і сімвал перамогі для тых, хто хоча бачыць Беларусь мірнай, моцнай і незалежнай. Без «уключэння» сэрца ні адно мерапрыемства ў гэты дзень не будзе мець сэнсу. Дык няхай кожны знойдзе ў гэтыя дні, і ў само 17 верасня для сябе асабісты сэнс.