Ваенна-патрыятычны клуб МНС адкрылі ў Бабруйску

Ваенна-патрыятычны клуб «Бабраня» адкрылі на базе Бабруйскага ГРАНС. Яго выхаванцамі стануць навучэнцы сярэдніх школ горада. Пра гэта расказала афіцыйны прадстаўнік Магілёўскага абласнога МНС Інэса Ялфімава.

Як адзначыла Інэса Ялфімава, адкрыццё новага ваенна-патрыятычнага клуба ў Бабруйску - яшчэ адзін важны крок у выхаванні падрастаючага пакалення. На базе клуба будуць праходзіць разнастайныя заняткі: дзеці будуць вучыцца навыкам бяспечных паводзін, дзейнічаць пры надзвычайных сітуацыях. А акрамя гэтага, яны змогуць яшчэ больш даведацца пра работу ратавальнікаў, гераічную гісторыю роднага краю і краіны.

Па словах начальніка Бабруйскага гаррайаддзела па надзвычайных сітуацыях Андрэя Бабіна, навабранцамі «Бабрэнка» сталі 20 навучэнцаў. «Мы жывем у свеце, дзе кожны можа сутыкнуцца з непрадбачанай сітуацыяй. Наша асноўная задача - гэта не толькі падрыхтаваць удзельнікаў клуба да дзеянняў у выпадку НС, але і навучыць іх клапаціцца пра сябе і бяспеку навакольных», - падкрэсліў ён.

Клуб «Бабраня» будзе працаваць па некалькіх ключавых напрамках: навучанне асновам бяспекі, практычныя заняткі, патрыятычнае выхаванне і спартыўныя мерапрыемствы.

На сённяшні дзень ВПК «Бабраня» стаў трэцім клубам, адкрытым у Магілёўскай вобласці на базе МНС. Так, у Магілёве ўжо больш за год працуе клуб «Ратавальнiк», сфарміраваны на базе пажарнага аварыйна-выратавальнага атрада Магілёўскага абласнога УМНС. Сярод яго выхаванцаў - звыш 20 хлопчыкаў і дзяўчынак з розных устаноў адукацыі горада.

Яшчэ адзін клуб працуе ў Клічаве. У склад ВПК «Паходня» ўваходзяць 12 хлопчыкаў і дзяўчынак з сярэдняй школы №1 Клічава. Каб час, праведзены ў ваенна-патрыятычным клубе, быў цікавым, а веды карыснымі, заняткі ў выхаванцаў праходзяць па некалькіх напрамках. Сярод іх - агнявая, страявая, ваенна-гістарычная і агульная фізічная падрыхтоўка, турызм і выжыванне ў экстрэмальных умовах, асновы бяспекі жыццядзейнасці і многае іншае.

«Ствараючы ваенна-патрыятычны клуб, мы ставілі перад сабой некалькі задач: гэта прафесійная арыентацыя, папулярызацыя культуры бяспекі жыццядзейнасці і выхаванне сапраўдных патрыётаў нашай краіны, нашай Радзімы, - гаворыць афіцыйны прадстаўнік Магілёўскага абласнога ўпраўлення МНС Інэса Ялфімава. - Мы вучым рабят паважаць гісторыю сваёй краіны, шанаваць памяць аб трагедыі Вялікай Айчыннай вайны і подзвігу нашага народа. Свядомасць моладзі зараз самая ўспрымальная: калі не ўкласці дзецям інфармацыю, што правільна і добра ў нашым жыцці, то яе ўкладуць іншыя. Работнікі МНС - гэта сапраўдныя патрыёты сваёй краіны. І нам важна, каб у будучыні тыя людзі, якія прыйдуць да нас служыць, таксама былі такімі, сталі нашай дастойнай зменай».

БЕЛТА