Валерый Малашка пра «Вялікую бард-рыбалку»: фестываль вырас з песень ля вогнішчаў да мультыкультурнага свята

Фестываль «Вялікая бард-рыбалка» вырас з песень ля вогнішчаў да мультыкультурнага свята. Такую думку выказаў намеснік старшыні Магілёўскага аблвыканкама Валерый Малашка падчас урачыстай цырымоніі адкрыцця XII музычнага фестывалю «Вялікая бард-рыбалка».

«Арганізаваўшыся ў 2010 годзе фактычна з песень ля вогнішча, гэтае мерапрыемства ператварылася ў вельмі знакавую, мультыкультурную падзею не толькі Магілёўскай вобласці, але і нашай краіны. Гэта падкрэсліваюць тыя шматлікія госці, якія прысутнічаюць тут, можа, не ў самай звыклай абстаноўцы. Асабліва гараджане, якія вырваліся з пыльных вуліц і размясціліся ў намётах у лесе і ўспамінаюць пра тое, што было ў жыцці, пра тое, што нас аб'ядноўвала і аб'ядноўвае ў жыцці, і тое, што з'яўляецца нашай будучыняй. Гэта добрыя бардаўскія песні, - сказаў ён. - Падзея мультыкультурная, таму што яна аб'яднала рыбную лоўлю, адпачынак ля вогнішча, паэзію і зносіны, будзем выбіраць і каралеву «Бард-рыбалкі» і спрабаваць гастраномію».

Намеснік старшыні адзначыў, што праходзіць фестываль у знакавым месцы. «Яно асаблівае ў экалагічным плане і з'яўляецца адным з найпрыгажэйшых мясцін нашай краіны. Тут фарміруецца сёння самабытны і цікавы турыстычны кластар, які ўключае ў сябе суб'ектаў агратурызму, экалогіі, прамысловага турызму, ёсць магчымасць адпачынку ў кемпінгах для каравайнераў. Людзі шукаюць такія месцы адпачынку, якія бюджэтныя і недарагія, але разам з тым дораць пэўны настрой», - падкрэсліў ён.

Яшчэ адна асаблівасць «Бард-рыбалкі» - гэта фестываль сямейнага адпачынку. «Паглядзіце, колькі тут сем'яў і дзяцей. Сем'яў маладых, пажылых. І гэта галоўны эфект нашага фестывалю», - адзначыў Валерый Малашка.

Як адзначыў старшыня Быхаўскага райвыканкама Дзмітрый Марціновіч, фестываль дорыць раёну большую папулярнасць. «Фэст праходзіць у такім прыгожым і каштоўным месцы. «Бард-рыбалка» папулярызуе наш раён і тыя паслугі, якія мы можам прапанаваць нашым гасцям, - адзначыў ён. - Гэтае свята, мы можам з упэўненасцю казаць аб гэтым, дапаможа ў развіцці і нашага турыстычнага кластара. Нам ёсць што паказаць і прапанаваць гасцям».

Фестываль стартаваў сёння на беразе Чыгірынскага вадасховішча, на тэрыторыі базы адпачынку Магілёўскага металургічнага завода «Чачэвічы». Праграма свята разлічана на тры дні. У гэтым годзе ўдзельнікамі фестывалю стануць 50 бардаў з Беларусі, Расіі і Латвіі. Сваёй творчасцю гасцей будзе радаваць расійская дэлегацыя з Сібіры «Станцыя Сібір». Адным з сюрпрызаў фестывалю стане прэзентацыя тэатра жывых лялек Святланы Панцялеевай з Томска.

Падораць сваю творчасць гасцям фестывалю расійскія выканаўцы Сяргей Мацвеенка і Раман Філіпаў. Удзельнікам «Вялікай бард-рыбалкі» стане выканаўца з Латвіі ўдзельнік шоу «Голас» Аляксандр Казакоў. Хэдлайнер свята - выканаўца з Расіі Ірына Сурына. Разбавіць бардаўскую праграму канцэрт «Рок-імправізацыя».

У час фестывалю пройдуць ужо традыцыйныя спаборніцтвы па рыбнай лоўлі і пляжным валейболе, конкурс прыгажосці «Каралева бард-рыбалкі». Смачныя пачастункі, майстар-класы, вялікая разнастайнасць інтэрактываў і яскравая творчая праграма не дасць гасцям фестывалю сумаваць. А час, праведзены з сям'ёй у намётавым лагеры на беразе маляўнічага вадаёма, стане прыемным дадаткам да свята.

Музычны фестываль «Вялікая бард-рыбалка» праходзіць з 28 па 30 ліпеня на беразе Чыгірынскага вадасховішча ў Быхаўскім раёне.

БЕЛТА