Васіль Захаранка: «Мы – сапраўдныя нашчадкі пераможцаў!»

Жыхары нашай краіны і не толькі працягваюць абмяркоўваць выступленне Прэзідэнта Беларусі Аляксандра Лукашэнкі напярэдадні Дня Незалежнасці.

Васіль Захаранка, старшыня Бялыніцкага райвыканкама:

– 2 ліпеня Аляксандр Рыгоравіч выступіў перад суайчыннікамі на ўрачыстым сходзе з асабліва моцнай і глыбока кранальнай прамовай. Выдатна разумеючы сённяшнія рэаліі жыцця, цалкам і поўнасцю падтрымліваю стратэгію, ініцыяваную кіраўніком нашай краіны, што нам ніколі не трэба забываць пра той складаны шлях, які прайшоў наш народ, пакуль не пачаў з гонарам называцца свабодным і незалежным. Апошняя, самая бесчалавечная ў гісторыі Вялікая Айчынная вайна, скончылася, фашызм – карычневая чума – здаецца, быў пераможаны. Але, як адзначыў прэзідэнт, «мы зноў, як на фронце, абараняем сваю гістарычную памяць. І самы небяспечны ў гэтай найперш ідэалагічнай вайне вораг не знешні. Вытокі заходняга рэваншызму відавочныя і зразумелыя. Здрада і абыякавасць сваіх – гэта самы страшны наш вораг». Страшна зараз бачыць тое, як многія народы забыліся, што перажылі іх нядаўнія продкі ў 1940-я гады і што цяпер яны шануюць забойцаў і маньякаў як нацыянальных герояў, якія разбураюць помнікі, узведзеныя ў гонар узмужнелых людзей, адважных абаронцаў сваёй Радзімы і сапраўдных вызваліцеляў Еўропы ад усіх праяў нацызму і фашызму.

Наш народ, які перажыў неймаверныя цяжкасці, не стаў перапісваць гісторыю Вялікай Айчыннай вайны, ён свята захоўвае ў сваім сэрцы сапраўдную памяць пра гераічнае мінулае. Менавіта таму мы даглядаем помнікі, прыводзім да іх сваіх дзяцей, збіраем жывыя ўспаміны сведкаў і факты пра тую вайну, пра нашых герояў, пішам карціны, песні, кнігі, здымаем фільмы.

Можа, скажу банальнасць, але мы зараз павінны рабіць тое, што лепш за ўсё ўмеем: працоўныя – стаяць ля станкоў, будаўнікі – будаваць, настаўнікі – вучыць, хлебаробы – вырошчваць збожжа, палітыкі – выбудоўваць стратэгію далейшага развіцця краіны. Самадысцыплінуючыся, узяўшы сябе ў рукі, адказна працуючы і не звяртаючы ўвагі на ўсю гэтую інфармацыйную шуміху, мы можам супрацьстаяць усім знешнім выклікам. Мы ўсе бачым, як хутка мяняецца свет і яго каштоўнасці, таму, змяняючыся ўслед за ім, асобныя рэчы павінны заставацца нязменнымі: памяць і любоў да сваёй краіны, быць адзінымі не толькі на словах, але і на справе. Тады мы будзем здольныя пераадольваць любыя канфлікты і перашкоды!

zara.by