Віктар Ананіч: якасць жыцця ў рэгіёнах немагчымая без даступнай і тэхналагічнай меддапамогі

Намеснік старшыні Пастаяннай камісіі Савета Рэспублікі па эканоміцы, бюджэце і фінансах, старшыня праўлення Беларусбанка Віктар Ананіч 8 студзеня павіншаваў калектыў Асіповіцкай цэнтральнай раённай бальніцы з векавым юбілеем установы аховы здароўя і ўручыў галоўнаму ўрачу Паўлу Шацілу сертыфікат на ўмацаванне матэрыяльна-тэхнічнай базы.

- У Год добраўпарадкавання, які працягвае Год якасці, важнай задачай для нас застаецца павышэнне якасці жыцця ў рэгіёнах. А гэта немагчыма без тэхналагічнай, даступнай і прафесійнай медыцынскай дапамогі. Для найбуйнейшага банка краіны падтрымка сферы аховы здароўя заўсёды была ў цэнтры ўвагі. На гэта накіраваны сацыяльны праект «Вектар дабрыні». Дзякуючы яму была палепшана матэрыяльна-тэхнічная база многіх бальніц і паліклінік па краіне, - адзначыў Віктар Ананіч.

За кошт спонсарскай дапамогі банка для Асіповіцкай ЦРБ будзе набыта стаматалагічная ўстаноўка з прыладдзем. А гэта значыць, што 44 тысячы пацыентаў, якіх абслугоўвае ўстанова, у новым годзе змогуць атрымліваць больш якасную стаматалагічную дапамогу.

- Сёння ў сценах бальніцы працуюць дастойныя людзі, якія вярнуліся на малую радзіму, каб быць запатрабаванымі і патрэбнымі там, дзе ў іх ведах, таленце і працавітасці асабліва маюць патрэбу. Нават складана ўявіць, колькі жыццяў было выратавана, колькі дзяцей з'явілася на свет дзякуючы прафесіяналізму і адданасці справе некалькіх пакаленняў урачоў і медперсаналу ўстановы, - сказаў Віктар Ананіч, уручаючы сертыфікат.

Дарэчы, ва ўстанове працуе нямала спецыялістаў з больш як 35-гадовым стажам, а ў некаторых ён перасягнуў адзнаку ў 60 гадоў. Асаблівы гонар установы - укамплектаванасць вузкімі спецыялістамі.

Парламентарый пажадаў калектыву бальніцы здароўя, а таксама дарыць магчымасць быць здаровымі ўсім сваім пацыентам.