Вопыт «лёгкіх ферм» Бялыніцкага ААТ «Аграсэрвіс»

Новыя адрыны для вырошчвання маладняку ў Бялыніцкім ААТ «Аграсэрвіс» з выгляду прымітыўныя: дашчаныя сцены, пабудовы значна ніжэйшыя за жалезабетонныя аналагі на малочна-таварным комплексе па суседстве. Але ўсё тут па-гаспадарску: сухая падсцілка і ў стойлах, і ў загонах, поўныя кармушкі.

У рад стаяць прафілакторыі для цялятаў (ад нараджэння да 3 месяцаў), затым памяшканне для ўтрымання жывёл да 6 месяцаў, наступны – звыш паўгода і апошні – для цёлак злучнага ўзросту. Будучы дойны статак сабраны ў адным месцы, разбіты на ўзроставыя групы, што значна спрашчае догляд і захаванне тэхналогій, каб маладняк рос здаровым і хутка набіраў вагу.

За сотняй самых маленькіх цялятаў у прафілакторыі прыглядаюць дзве цялятніцы. Лідзія Казлова кажа, што цалкам спраўляецца з напарніцай з гэтым «дзіцячым садам»:

– У гаспадарцы цяпер няма праблем ні з кармамі, ні з саломай. Наша справа – своечасова накарміць, напаіць, памяняць подсціл. Прывагі атрымліваем пад кілаграм – не той, што раней. Адсюль і наша зарплата ў кагосьці 700 рублёў, у кагосьці – 1000. А раней у разы ніжэйшая была. За кожнага цяляці перажываем, каб своечасова заўважыць, што апетыт знік і паведаміць ветэрынару. Ад гэтага наўпрост залежыць наш заробак.

Сёння пытанне, як захаваць маладняк і не дапусціць невытворчае выбыццё жывёлы, актуальнае ва ўсім рэгіёне. У гэтай бялыніцкай гаспадарцы яно стаяла асабліва востра. Прычыну не хаваюць – безгаспадарчасць пры ранейшым кіраўніку, ігнараванне тэхналагічных патрабаванняў. Цяперашні дырэктар Віктар Крыванос, які ўзначаліў сельгаспрадпрыемства ў маі гэтага года, неахвотна расказвае, у якім стане яму дасталіся фермы: гразь, мізэрныя прывагі, падзеж:

– Усюды павінна выконвацца тэхналогія. А якіх прывагаў можна было чакаць, калі ўтрымліваліся цяляты дзе папала: адны побач з каровамі стаялі, ніякай сарціроўкі жывёлы.

Нашай гаспадарцы патрэбны ветэрынар і заатэхнік. Што тычыцца ветэрынара, гарантуем заробак 1500 рублёў, службовую машыну і жыллё. Капітальныя цялятнікі з жалезабетону і цэглы гаспадарка б не пацягнула. Яны абышліся б у разы даражэй, усё б лягло на сабекошт прадукцыі. Каб нават гэтыя, палегчанай канструкцыі, пабудаваць, была аказана фінансавая дапамога з абласнога і раённага бюджэтаў. Трэба было тэрмінова наводзіць парадак.

Кампактныя прафілакторыі для цялятаў гаспадарка пабудавала сама, а вось 3 будынкі для адкорму маладняку – праца Бялыніцкага ПМК-241. Што з сябе ўяўляе канструкцыя: металічныя каркасы, бетонныя падлогі, шыферны дах і ашалёўка сцен з дошкі. Фактычны кошт аб’екта (тэрміны будаўніцтва люты–красавік) – больш за 620 тысяч рублёў. У столькі абышліся 3 пабудовы. Паводле слоў кіраўніка гаспадаркі, адзін капітальны хлеў з бетону і цэглы каштаваў бы 2,5 млн. рублёў. Як гаворыцца, адчуйце розніцу.

Вопыт «лёгкіх ферм» будзе растыражаваны і ў іншых гаспадарках вобласці, – дзеліцца планамі старшыня Камітэта па сельскай гаспадарцы і харчаванні Магілёўскага аблвыканкама Віктар Віткоўскі:

– Малазатратныя і хуткаўзведзеныя адрыны па вырошчванні маладняку буйной рагатай жывёлы гасспосабам яшчэ раней былі пабудаваны ў СВК «Калгас “Радзіма”» Мы нацэльваем гаспадаркі на захаванне тэхналогіі, зараз праводзім семінары для заатэхнікаў, ветурачоў, загадчыкаў ферм раёна. Праводзім практычныя заняткі: як выпаіць цяляці малодзівам у першыя гадзіны жыцця пры дапамозе зонда, як захаваць маладняк. Дэфіцыт спецыялістаў зааветслужбы – гэта біч жывёлагадоўчай галіны ў рэгіёне. Забяспечанасць ветслужбай складае 53 %, заатэхнічнай – 72 %. У чым эканоміка тых жа прыбаўленняў? Калі сярэднясутачнае прыбаўленне складае 850 г і вышэй, то палавой сталасці цялушачка дасягае ў 13-15 месяцаў, а калі прыбаўленні мізэрныя 300-400 г, то ў 25-30 месяцаў. Уяўляеце, якія неабгрунтаваныя расходы на кармы, электраэнергію, заробак. Невытворчага выбыцця жывёлы можна пазбегнуць, выконваючы тэхналогію. Такія задачы сёння мы ставім перад усімі сельгасарганізацыямі вобласці.

mogilevnews.by