Выбраны кіруючы склад Магілёўскай абласной камісіі па выбарах Прэзідэнта Рэспублікі Беларусь

На першым пасяджэнні Магілёўскай абласной камісіі па выбарах Прэзідэнта Рэспублікі Беларусь абраны яе кіруючы склад. Адкрыў першае пасяджэнне старшыня аблвыканкама Анатоль Ісачанка.

Як паведамлялася раней, абласная камісія ўтворана 4 лістапада ў максімальна магчымым складзе - 13 чалавек.

На першым паседжанні сябры камісіі аднагалосна абралі яе старшынёй Яўгена Алекса. Ён падзякаваў за аказаны давер і адзначыў, што нягледзячы на розны ўзрост, жыццёвы і прафесійны вопыт, грамадзянскую пазіцыю членаў камісіі, усе яны адзіныя ў адным: «Той стрыжань і тая аснова, што нас звязвае - гэта пачуццё любові да нашай радзімы. Тое пачуццё, якое сёння патрэбна кожнаму грамадзяніну, які жыве ў нашай краіне. Тое, што дазваляе жыць, працаваць, развівацца самому і развіваць нашую краіну. Мы ўсведамляем усю тую адказнасць, якая на нас ускладзена».

Ён таксама адзначыў, што ў складзе камісіі сёння прадстаўлены ўсе суб'екты грамадзянскай супольнасці: прадстаўнікі палітычных партый, грамадскіх аб'яднанняў і арганізацый, працоўных калектываў, вылучаныя грамадзянамі шляхам падачы заяў.

«Гэта людзі, якія валодаюць неабходнымі ведамі, досведам удзелу ў папярэдніх электаральных кампаніях і ў працы абласной камісіі, - падкрэсліў Яўген Алекса. - Мы настроены на эфектыўную працу, на тое, што электаральная кампанія традыцыйна ў нашай вобласці праходзіць арганізавана. Безумоўна, будзем каардынаваць сваю работу з іншымі тэрытарыяльнымі камісіямі, якія створаны ў рэгіёне, аказваць арганізацыйна-метадычную дапамогу. Мы настроены таксама правесці добра гэтую электаральную кампанію, як і папярэднюю, якая была звязана з адзіным днём галасавання.

У сваёй рабоце мы абавязаны прытрымлівацца як агульначалавечых прынцыпаў, так і няўхільна выконваць патрабаванні Асноўнага закона нашай краіны - Канстытуцыі Рэспублікі Беларусь і Выбарчага кодэкса. Гэта два асноўныя дакументы ў любую электаральную кампанію або рэферэндум.

Паўтаруся, я глыбока ўпэўнены ў тым, што кожны з членаў камісіі – патрыёт нашай краіны. Мы шчыра любім нашу Беларусь. І, безумоўна, гэтае адчуванне, трансфармуецца ў нашу працу. Патрыятызм - гэта галоўная якасць, якая дазваляе любому грамадству, любой краіне з упэўненасцю глядзець у заўтрашні дзень. А нашым грамадзянам разам з нашай краінай будаваць сваю будучыню, гадаваць дзяцей, жыць пад мірным небам».

Таксама на першым пасяджэнні былі абраныя намеснік старшыні камісіі і сакратар.

Зацверджаны і рэжым работы абласной камісіі, распарадак і графік дзяжурстваў, абазначаны іншыя арганізацыйныя моманты.

Абласная камісія арганізуе правядзенне выбараў Прэзідэнта, ажыццяўляе кантроль за выкананнем патрабаванняў Выбарчага кодэкса і іншых актаў заканадаўства аб выбарах на тэрыторыі вобласці. Таксама яна кіруе дзейнасцю раённых і ўчастковых камісій, ажыццяўляе іншыя функцыі, звязаныя з выбарчай кампаніяй.

Выбары Прэзідэнта Беларусі назначаны на 26 студзеня 2025 года.

Юлія Таранава, фота Галіны Гаўрыловіч