Вынікі сацыяльна-эканамічнага развіцця Магілёўскай вобласці за I квартал 2025 года абмеркавалі на пасяджэнні аблвыканкама

Пасяджэнне Магілёўскага аблвыканкама аб выніках сацыяльна-эканамічнага развіцця і выканання бюджэту вобласці за першы квартал 2025 года правёў сёння старшыня аблвыканкама Анатоль Ісачанка. Удзел у яго рабоце таксама прынялі кіраўнік Адміністрацыі Прэзідэнта Дзмітрый Крутой, памочнік Прэзідэнта – інспектар па Магілёўскай вобласці Сяргей Налівайка, старшыня абласнога Савета дэпутатаў Аляксандр Гарошкін. У фармаце відэаканферэнцыі да пасяджэння далучыліся дэпутаты Палаты прадстаўнікоў Нацыянальнага сходу Рэспублікі Беларусь. У зале прысутнічалі члены выканкама, члены Савета Рэспублікі Нацыянальнага сходу, старшыні гарадскіх і раённых Саветаў дэпутатаў, старшыні гаррайвыканкамаў, кіраўнікі адміністрацый раёнаў у Магілёве і Бабруйску, прадстаўнікі кантралюючых і сілавых ведамстваў, кіраўнікі структурных падраздзяленняў аблвыканкама і прадпрыемстваў.

Анатоль Ісачанка адзначыў, што ў бягучым годзе эканоміка вобласці захоўвае дадатную дынаміку, асноўныя галіны дэманструюць паступальны рост.

«У першым квартале выканана шэсць з дзевяці мэтавых паказчыкаў матрыцы задач, устаноўленых урадам. Не забяспечана выкананне паказчыкаў па ўводу жылля з дзяржпадтрымкай, індэксе спажывецкіх цэн. Па тэмпе выпуску валавога рэгіянальнага прадукту вынік склаў 102% пры заданні 102,7%».

Пры гэтым, як адзначыў кіраўнік рэгіёна, усе галіны рэальнага сектара эканомікі спрацавалі з ростам. Рост аб'ёмных паказчыкаў станоўча адбіваецца на фінансавым стане арганізацый, павышэнні даходаў насельніцтва, выкананні бюджэту. Бюджэт выконваецца ў адпаведнасці з заканадаўствам - усе ўзятыя абавязацельствы выконваюцца. «Разам з тым, асаблівую заклапочанасць выклікае праца нашых дрэваапрацоўчых прадпрыемстваў канцэрна «Беллеспаперапрам» – гэта «Фандак» і «Магілёўдрэў». На жорсткім кантролі работа ААТ «Магілёўхімвалакно», - падкрэсліў ён.

Анатоль Ісачанка прапанаваў заслухаць у рамках пасяджэння кіраўнікоў першых дзвюх арганізацый, а стратэгію развіцця трэцяга абмеркаваць у гэты ж дзень з выездам на прадпрыемства. Таксама ён звярнуўся да кіраўнікоў усіх узроўняў і нагадаў, што 2025 год - гэта завяршальны год пяцігодкі: «Усе пастаўленыя задачы павінны быць рэалізаваны ў поўным аб'ёме», - падкрэсліў ён.

Як расказаў у сваім дакладзе старшыня камітэта эканомікі аблвыканкама Аляксандр Варапаеў, у I квартале 2025 года Магілёўская вобласць прадэманстравала ўстойлівы рост ключавых паказчыкаў. Усе галіны рэальнага сектара эканомікі ўнеслі ўклад у павелічэнне валавога рэгіянальнага прадукту. Індэкс прамысловай вытворчасці дасягнуў 101,1%, пацвярджаючы стабільнасць прамысловага комплексу. Значны рост зафіксаваны ў будаўнічай галіне: аб'ёмы падрадных работ выраслі на 9,3%, а будаўніча-мантажных - на 2,3% у параўнанні з аналагічным перыядам 2024 года.

Арганізацыі рэгіёну ўмацавалі фінансавую ўстойлівасць: чысты прыбытак за студзень-люты 2025 года склаў Br285,5 млн, што ў 1,8 раза перавышае вынік пачатку 2024 года. Знешні гандаль таксама паказаў высокую эфектыўнасць: станоўчае сальда дасягнула $105,2 млн, што падкрэслівае канкурэнтаздольнасць абласных прадпрыемстваў на міжнародных рынках.

Такім чынам, Магілёўская вобласць дэманструе збалансаванае развіццё, якое спалучае эканамічную дынаміку, адказнае кіраванне бюджэтам і сацыяльную арыентаванасць. Дасягнутыя вынікі ствараюць трывалую аснову для выканання гадавых планаў і павышэння якасці жыцця насельніцтва рэгіёна. Аднак асобныя напрамкі патрабуюць павышанай увагі.

Так, адказваючы на пытанні журналістаў пасля пасяджэння, Дзмітрый Крутой адзначыў, што нягледзячы на існуючую станоўчую дынаміку, на парадак дня былі вынесены пераважна праблемныя напрамкі: «Усё ж выніковы прагнозны паказчык развіцця рэгіёну - гэта валавы рэгіянальны прадукт - у першым квартале не дасягнуты (102 %, пры заданні 102,7%). І ў гэтым прыросце асаблівую заклапочанасць выклікае сектар прамысловасці - яго ўклад знізіўся (усяго толькі плюс 0,4%). І сёння на выканкаме мы даволі падрабязна паглядзелі на працу ключавых прамысловых прадпрыемстваў. Так, складаныя вонкавыя рынкі. У нас экспартаарыентаваная эканоміка ў цэлым. І доля экспарту прадукцыі для магілёўскіх прадпрыемстваў таксама вельмі высокая. Сітуацыя на расійскім рынку, сітуацыя на азіяцкіх рынках у першым квартале была адкрыта цяжкай для нашых экспарцёраў, таму па шэрагу прадпрыемстваў назіраецца рост складскіх запасаў, зніжэнне чыстага прыбытку і рэнтабельнасці. З-за гэтага адбываецца ціск на інвестыцыйныя планы, якія таксама даволі амбіцыйныя. І завяршальны год пяцігодкі, і прэзідэнцкая праграма «Адзін раён - адзін праект», і праграма развіцця паўднёва-ўсходніх рэгіёнаў. Там асобны пакет ільгот і арганізацыі, на якія мы разлічваем у плане паспяховага завяршэння менавіта інвестыцыйных планаў».

Кіраўнік Адміністрацыі Прэзідэнта растлумачыў, што баланс бягучай дзейнасці і рэалізацыі інвестыцыйных праектаў для многіх прадпрыемстваў сёння стаў вельмі сур'ёзным выклікам і выпрабаваннем.

«І тыя стратэгіі, якія літаральна ў рэжыме анлайн даводзіцца распрацоўваць і разглядаць для таго, каб ні ў якім разе не дапусціць сацыяльнай напружанасці, скарачэння колькасці занятых у эканоміцы або, дапусцім, зніжэння заработных плат - гэта выклік для кіраўнікоў прамысловых прадпрыемстваў у Магілёўскай вобласці. Найбольш складаныя сітуацыі, якія з'яўляюцца сёння самымі надзённымі – гэта сферы дрэваапрацоўкі і нафтахімічнага комплексу, таму мы надаем ім зараз асаблівую ўвагу».

Дзмітрый Крутой адзначыў, што менеджмент нашых прадпрыемстваў сапраўды працуе ў рэжыме мабілізацыйнай эканомікі, як таго патрабуе Прэзідэнт: «Гэта не першы выпадак у нашай эканамічнай гісторыі, калі ў нас дзесьці растуць складскія запасы, дзесьці парушаецца дынаміка фінансавых абавязацельстваў па інвестыцыйных планах. Пры гэтым цешыць, што мы, не чакаючы ні году, ні двух, ні трох гадоў, гэтыя тэндэнцыі ўлоўліваем і тут жа на іх рэагуем, распрацоўваючы дзесьці сітуатыўныя, але правільныя метады рэгулявання дзейнасці прадпрыемстваў. Можа, нават на такім мікраўзроўні, але па-іншаму немагчыма. У нас няма значных і ня значных прадпрыемстваў».

Ён падкрэсліў, што сёння вялікая ўвага была нададзена і прадпрыемствам прыватнай формы ўласнасці, якія знаходзяцца ў свабодных эканамічных зонах: «Яны таксама знаходзяцца пад гэтым ціскам стану рынкаў, яны таксама буйныя экспарцёры. І, я думаю, ім прыемна, што органы ўлады, у тым ліку, зважаюць на іх праблемы і ўдзельнічаюць у выпрацоўцы нейкіх агульнакраінавых рашэнняў».

Дзмітрый Крутой абазначыў, што ў эканоміцы вобласці меншая ўвага сёння была ўдзелена іншым сектарам, такім як транспарт, гандаль або сельская гаспадарка. Паводле яго слоў, гэта не значыць, што там няма пытанняў, аднак праблемы, якія існуюць, не носяць сістэмнага або крытычнага характару. У той жа час стан прамысловасці, з улікам удзельнай вагі больш як 20%, уплывае ў цэлым на ўсе эканамічныя і фінансавыя паказчыкі рэгіёну, такім чынам, патрабуе асабліва ўважлівага кантролю і аператыўнага рэагавання на абставіны, якія ўзнікаюць.

Асобна кіраўнік Адміністрацыі Прэзідэнта спыніўся яшчэ на адным даручэнні кіраўніка дзяржавы, абазначаным ім падчас рабочай паездкі на Магілёўшчыну 22 красавіка: стварыць са Шклоўскага раёна ўзорна-паказальны прыклад для ўсёй краіны, тым самым вызначыўшы курс развіцця рэгіёнаў. Дзмітрый Крутой падкрэсліў, што той набор базавых прадпрыемстваў - якія будуць сёння аднаўляцца, развівацца, будавацца з нуля і праз пяць гадоў стануць каркасам і апорай эканомікі аднаго раёна - не можа быць універсальным для ўсіх астатніх, з улікам існуючых кампетэнцый, наяўнасці працоўных і фінансавых рэсурсаў. Таму раёнам трэба ўжо сёння задумацца аб тым, каб выдзеліць такі набор базавых арганізацый у сваім рэгіёне. І зрабіць гэта старшыням райвыканкамаў даручана цягам двух-трох месяцаў. Гэта дасць магчымасць выбудаваць рэальнае размеркаванне прадукцыйных сіл, пазбегнуць адтоку эканамічна актыўнага насельніцтва з раёнаў і сфарміраваць контуры будучай структуры эканомікі Магілёўскай вобласці для яе далейшага эфектыўнага развіцця.

Юлія Таранава, фота Галіны Гаўрыловіч