Вынікі XVI Міжнароднага маладзёжнага тэатральнага форуму «М.@rt.кантакт» падвялі ў Магілёве

Традыцыйна 27 сакавіка - у Сусветны дзень тэатра - у Магілёве адбылося ўрачыстае закрыццё XVI Міжнароднага маладзёжнага тэатральнага форуму «М.@rt.кантакт» з падвядзеннем вынікаў конкурснай праграмы. Уладальнікам галоўнага прыза «Залатая маска» стаў спектакль «Пачупкі» Рэспубліканскага тэатра беларускай драматургіі з Мінска.

«Гэта вялікі гонар і радасць для калектыву тэатра, усёй творчай каманды, якая працавала і працягвае працаваць над гэтым праектам», - сказала кампазітар і музычны кіраўнік тэатра Кацярына Аверкава, атрымліваючы ўзнагароду.

Рашэннем маладзёжнага журы лепшым прызнаны спектакль «Марыя Сцюарт» Пецярбургскага камернага тэатра «ТОК» (Расія), рэжысёр Андрэй Багданаў. Нягледзячы на тое, што спектакль ставіўся на псеўданямецкай мове, гэта ніколькі не перашкодзіла гледачу атрымаць асалоду ад ігры акцёраў, а экспертам па заслугах ацаніць пастаноўку.

«Вельмі прыемна было пабываць на форуме, сапраўдным свяце тэатральнага мастацтва. Глядач - гэта самае галоўнае, што ёсць у тэатры, таму дзякуй кожнаму з вас», - карыстаючыся магчымасцю, падзякаваў публіцы Андрэй Багданаў.

Прыз сімпатый гледачоў дастаўся спектаклю «Людзі Ламанчы» Арлоўскага дзяржаўнага тэатра для дзяцей і моладзі «Вольная прастора» (Расія), рэжысёр Аляксандр Міхайлаў.

Папярэджваў падвядзенне вынікаў у гэты дзень паказ спектакля «Шалёныя грошы» Магілёўскага абласнога драмтэатра.

Віншуючы пераможцаў і звяртаючыся да ўсіх удзельнікаў форуму, старшыня Магілёўскага гарвыканкама Аляксандр Студнеў адзначыў: «Сёння мы ўдвая нацешыліся як ігрой артыстаў, так і святочнай цырымоніяй. Дзякуй акцёрам за радасць зносін, настрой. Тэатральныя жанры на пляцоўцы форуму былі прадстаўлены самыя разнастайныя, яшчэ раз прадэманстраваўшы, што менавіта гэта дазваляе нам сёння згуртавацца. Упэўнены, што кожны з нас атрымаў пэўны запас эмоцый. І за гэта мы дзякуем кожнаму ўдзельніку тэатральнага форуму».

Таксама былі ўручаны і спецыяльныя дыпломы форуму.

Так, спектакль «Чарлі Чаплін» Дзяржаўнага тэатра драмы і камедыі імя Азербайджана Мамбетава (Астана, Казахстан) быў адзначаны за лепшы акцёрскі ансамбль.

«Дзякуй вялікі за самы цёплы прыём, які вы наладзілі спектаклю. Хоць ён быў на казахскай мове, але значыць, закрануў, патрапіў, значыць, усё не дарма», - падзяліўся эмоцыямі рэжысёр пастаноўкі Мікалай Балабан.

Адзначылі члены журы і бліскучую акцёрскую работу Мікалая Балабану ў спектаклі «Фаўст» Пецярбургскага камернага тэатра «ТОК» (Расія).

Таксама былі адзначаны спецыяльнымі дыпломамі акцёр Уладзімір Ільін - за выкананне ролі Саціна ў спектаклі «На дне» Пермскага тэатра «Ля Моста» (Расія), спектакль «Карэніна» Тэатральнага праекта «ТрыТфармаТ» з Мінска - за арыгінальнае рашэнне рускай класікі, спектакль «Локіc» Гродзенскага абласнога тэатра лялек.

За восем дзён форуму на розных пляцоўках горада было паказана 19 спектакляў з Расіі, Казахстана, Балгарыі, Беларусі. Сёлета форум прайшоў у звыклым дакавідным фармаце: з конкурснай праграмай, работай прафесійнага і маладзёжнага журы, абмеркаваннем спектакляў, работай тэатральных кулуараў. Адбыліся майстар-класы, творчыя сустрэчы, паказы майстэрні маладой рэжысуры. Новаўвядзеннем стаў дадатковы тэатральны дзень - форум стартаваў на дзень раней, падарыўшы знатакам мастацтва магчымасць наведаць больш спектакляў.

Юлія Таранава, фота Галіны Гаўрыловіч