Выстава твораў студыі ваенных мастакоў «Айчыне служым» адкрыецца сёння ў Магілёве

Праўда аб чалавечай драме на вайне ажыве сёння на выставе студыі ваенных мастакоў «Айчыне служым» у Магілёўскім абласным мастацкім музеі імя П. В. Масленікава.

Экспазіцыя прымеркавана да Года гістарычнай памяці. На ёй будуць прадстаўлены работы членаў студыі, а таксама работы магілёўскіх мастакоў. Лейтматыў вернісажу – любоў да Радзімы, абарона яе межаў, дасягненні чалавека ў мірным жыцці.

Як расказалі супрацоўнікі музея, выставачны праект «Абаронцам Айчыны прысвячаецца...» – гэта пазіцыя мастакоў студыі ваенных мастакоў сённяшняга дня, гэта жаданне аўтараў данесці да цяперашніх пакаленняў тое, што пражыта старэйшым пакаленнем і не выкраслена з народнай памяці. Гэта падзяка ўсім, хто прынёс вялікую перамогу, і ўсім тым, хто годна працягвае воінскія традыцыі, забяспечваючы сёння мір на нашай зямлі. Гэта адчуванне гонару за мужных абаронцаў Радзімы, за моцную і квітнеючую Беларусь.

Вобразнае ўвасабленне воінскага подзвігу ў сюжэтна-тэматычных карцінах і партрэтах, прадстаўленых на выставе, тэма сучаснасці ў творах розных жанраў, прысвечаных ратнай працы, духоўнаму свету воіна нашых дзён, сведчаць пра тое, што героіка-патрыятычная тэма плённа і разнастайна развіваецца беларускімі мастакамі.

Выстава прабудзе ў музеі да 23 снежня.

Ред.