Выязныя прыёмы грамадзян дазваляюць атрымаць зрэз актуальных пытанняў на месцах – Андрэй Кунцэвіч

Выязныя прыёмы грамадзян дазваляюць атрымаць зрэз актуальных пытанняў на месцах. Такім меркаваннем з журналістамі падзяліўся намеснік кіраўніка Адміністрацыі Прэзідэнта Андрэй Кунцэвіч падчас такога прыёму сёння ў Бялыніцкім райвыканкаме.

«Выязныя прыёмы грамадзян практыкуюцца Адміністрацыяй Прэзідэнта ўжо шмат гадоў. Яны з’яўляюцца пэўным барометрам, які дазваляе атрымаць зрэз найбольш актуальных і хвалюючых людзей пытанняў», – адзначыў Андрэй Кунцэвіч.

Жыхары Бялыніцкага раёна звярталіся да намесніка кіраўніка Адміністрацыі Прэзідэнта з нагоды рамонту дарог, добраўпарадкавання тэрыторый, атрымання жылля шматдзетнымі сем’ямі, дапамогі ў вырашэнні міжасобасных канфліктаў. Усяго на прыём запісалася восем чалавек.

Жыхары вуліцы Кірава ў Бялынічах папрасілі дапамагчы з асфальтаваннем часткі дарогі на гэтай вуліцы. Мясцовыя жыхары паскардзіліся, што побач з іх дамамі ў непагадзь складана прайсці. «Па краі дарогі людзі могуць у туфлях хадзіць, а да нас бліжэй даводзіцца гумовыя боты апранаць», – паведаміла жанчына. Андрэй Кунцэвіч адзначыў, што мясцовая ўлада ведае пра праблему і, як толькі з’явіцца магчымасць, гэтую частку дарогі прывядуць у парадак. Гэта пытанне будзе перададзена на кантроль аблвыканкаму.

Жыхарка аграгарадка Цяхцін прасіла прывесці ў парадак пясчаную дарогу побач з яе домам: у дрэннае надвор’е пясок змывае проста пад плот. Сітуацыя таксама ўзята на кантроль, за яе рашэннем будуць сачыць адказныя службы Магілёўскага аблвыканкама.

Шматдзетная маці з Бялынічаў папрасіла растлумачыць пытанне з атрыманнем жылля. Яна адна выхоўвае чатырох дзяцей, у 2013 годзе яе сям’я пабудавала трохпакаёвую кватэру. Сям’я стаіць на ўліку маючых патрэбу ў паляпшэнні жыллёвых умоў у Бялыніцкім райвыканкаме. Жанчына хацела купіць кватэру на другасным рынку ў Магілёве. Ёй сказалі, што такое набыццё не будзе афармляцца пры падтрымцы дзяржавы: заканадаўча няма такой магчымасці. Жанчыне патлумачылі, як і дзе яна можа прэтэндаваць на льготы і якое жыллё атрымаць.

Сярод тых, хто звярнуўся, быў і жыхар Магілёва. У мужчыны свая фермерская гаспадарка, якая паспяхова працуе шмат гадоў. Аднак ён адзначыў, што з адным з суседзяў ужо доўга не можа знайсці агульную мову: той скардзіцца на яго ў розныя інстанцыі і, як следства, фермерская гаспадарка пастаянна падвяргаецца праверкам дзяржорганаў. Мужчына лічыць, што дзеянні суседа неабгрунтаваныя, прымірыцца самастойна ў іх не атрымліваецца. Андрэй Кунцэвіч прапанаваў наладзіць калектыўную сустрэчу з жыхарамі населенага пункта і паспрабаваць усім разам знайсці рашэнне канфлікту.

«Зыходзячы з тых, хто сёння запісаўся на прыём, відаць, што мясцовая ўлада спраўляецца з рашэннем бягучых праблем. Аднак ёсць асобныя моманты, якія патрабуюць умяшальніцтва рэспубліканскіх органаў кіравання, і, я думаю, агульнымі намаганнямі мы знойдзем патрэбнае рашэнне для кожнай сітуацыі», – адзначыў Андрэй Кунцэвіч.

БЕЛТА, фото СБ