Якасць дарог, капрамонт, пытанні асвятлення - Мартынюк правёў прыём грамадзян у Круглым

Сёння ў Круглянскім райвыканкаме прайшоў выязны прыём грамадзян. Да памочніка Прэзідэнта - інспектара па Магілёўскай вобласці Леаніда Мартынюка звярнуліся жыхары не толькі Круглянскага раёна, але і Магілёўскага. Заяўнікі ўзнімалі тэмы якасці дарог у аграгарадках і вёсках, асвятлення населеных пунктаў, капітальнага рамонту шматкватэрных дамоў.

Жыхар аграгарадка Сідаравічы Магілёўскага раёна Уладзімір Дубравенка закрануў адразу некалькі пытанняў, якія датычацца яго населенага пункта. Першая тэма - набалелая: на вуліцы Рачная дарожнае пакрыццё пакідае жадаць лепшага.

- Асабліва па вясне праблемы. У гэтым сезоне чатыры машыны «патанула». Звярталіся ў райвыканкам, нам абяцалі грэйдзіраваць праблемны ўчастак. Грэйдэр сапраўды прыязджаў, але дарожнікі падышлі да работ не зусім правільна. У выніку бягучы рамонт выканалі няякасна. Просім прывесці вуліцу ў парадак, - звярнуўся заяўнік.

Леанід Мартынюк даручыў абласному ўпраўленню ЖКГ і Магілёўскаму райвыканкаму яшчэ раз разабрацца ў сітуацыі. І адзначыў:

- Ёсць прыярытэтныя напрамкі ў рамонце дарожнага палатна. У абласной ЖКГ, таксама ў раёне ведаюць крытычныя ўчасткі і надаюць ім першачарговае значэнне. Далей падыходзяць да рашэння кропкавых праблем. Адназначна: калі грэйдэр працуе, усё павінна быць зроблена якасна.

Другое пытанне, якое ўзняў заяўнік, датычылася асвятлення населенага пункта. На некаторых апорах не гараць лямпачкі. У сітуацыі даручана дэталёва разабрацца філіялу «Магілёўскіх электрычных сетак».

З аграгарадка Камсенічы Круглянскага раёна паступіў калектыўны зварот. У шматкватэрным доме на восем сем'яў праходзіць капітальны рамонт. З-за няякасных работ па замене даху дажджы залілі кватэры.

- Праблемы з дахам у нас былі даўно. Але пачаўся рамонт, мы ўзрадаваліся. Аднак пайшлі дажджы. Вада пазалівала кватэры, сапсавала столі, шпалеры. Хто кампенсуе нам выдаткі на рамонт? - абураюцца заяўнікі. - Вада дайшла да першага паверха!

Старшыня Круглянскага райвыканкама Сяргей Ермаліцкі пракаментаваў сітуацыю:

- На жаль, па капітальным рамонце дома ў аграгарадку Камсенічы скаргі і звароты грамадзян сапраўды абгрунтаваныя. Падрадная арганізацыя - Круглянскае УКП «Жылкамгас» - не змагла забяспечыць якаснае выкананне работ. Падчас рамонту даху не забяспечылі укрыццё адпаведным чынам, што прывяло да заліцця кватэр жыхароў. У сувязі з гэтым, натуральна, складзены адпаведныя дакументы - акты заліцця. Мы павялічылі тэмпы капітальнага рамонту дома. Да канца бягучага месяца ўсе работы будуць выкананы, а жыхарам адновяць кватэры.

Раней, дарэчы, раённы «Жылкамгас» не праводзіў такія віды работ. Аднак ужо другі год запар дадзеная арганізацыя, атрымаўшы ліцэнзію, займаецца капрамонтамі.

Пасля прыёму памочнік Прэзідэнта - інспектар па Магілёўскай вобласці Леанід Мартынюк заўважыў, што прагучалі сур'ёзныя пытанні:

- Тая практыка, якую ўжываем ужо даўно, а менавіта прыёмы грамадзян на месцах, паказвае сваю эфектыўнасць. Безумоўна, гэта дае магчымасць убачыць больш тонкія і вузкія месцы ў развіцці рэгіёну. Канешне, на прыём прыходзяць не толькі людзі з сельсаветаў, дзе праходзяць прыёмы. Прыязджаюць і з іншых раёнаў. Сёння людзі прыходзілі з пэўнымі праблемамі, якія былі агучаныя і ўзятыя на кантроль.

Леанід Мартынюк дадаў, што часта сельскае насельніцтва ўзнімае лакальныя, але вельмі важныя для іх пытанні - пакосу травы, выдзялення пашы. Усе гэтыя тэмы павінны штодзень вырашацца на месцах старшынямі сельвыканкамаў.

 СБ