Якасць капрамонту дамоў, транспартныя зносіны. Анатоль Ісачанка правёў выязны прыём грамадзян у Дрыбіне

Старшыня Магілёўскага аблвыканкама Анатоль Ісачанка правёў выязны прыём грамадзян у Дрыбінскім райвыканкаме. Да кіраўніка рэгіёну звярнуліся некалькі чалавек, у ліку асноўных пытанняў - якасць капітальнага рамонту дамоў, транспартныя зносіны паміж населенымі пунктамі, праблема безгаспадарнага жылля ў вёсках.

«Калі чалавек прыйшоў на прыём, яго трэба выслухаць і паспрабаваць дапамагчы, - падкрэсліў Анатоль Ісачанка. — Сёння палова заяўнікаў звярнуліся з грамадскімі пытаннямі, частка — з асабістымі: гэта аўтобусныя зносіны, накіраванне дзіцяці на вучобу, капітальны рамонт жылфонду. Цікавая тэма тычыцца дамоў, якія пабудаваны і лічацца як арэнднае жыллё, але як арэнда не выкарыстоўваецца. Трэба выставіць іх на продаж - магчыма, хтосьці захоча выкупіць па рэшткавым кошце. Мы гэтую тэму адпрацуем. Па ўсіх напрамках дадзены даручэнні і будуць прыняты рашэнні, усе пытанні пастаўлены на кантроль».

Жыхары аграгарадка Трылесіна расказалі, што ў 2023 годзе ў іх дамах быў зроблены няякасны капітальны рамонт. Нараканні выклікаў шэраг недахопаў, у тым ліку дрэнна зробленая отмостка вакол будынкаў, не ўсталяваны казырок над балконамі і адлівы, навала на пляцоўцы паміж дамамі вады пасля дажджу і яе праходжанне ў склеп, дэфармаваныя дзверы ў пад'ездзе. Дарога да дамоў таксама разбіта - па ёй ездзілі лесавозы. Заяўнікі ўжо звярталіся год таму па гэтых пытаннях і не атрымалі належнага адказу. Анатоль Ісачанка даручыў разабрацца ў сітуацыі: на працягу тыдня з выездам на месца правесці экспертызу і далажыць аб яе выніках, максімум на працягу паўтара месяца ліквідаваць усе недахопы, у тым ліку зрабіць пад'язную дарогу.

На прыёме таксама было агучана пытанне транспартных зносін Горкі - Дрыбін - Магілёў, які праходзіць праз аграгарадок Расна. Калі раней пасажырскімі перавозкамі займалася дзяржаўнае прадпрыемства, зараз на маршруце працуе прыватнік. У сувязі з гэтым кошт праезду вырас, а пэўныя льготы перасталі дзейнічаць, да пункта прызначэння (таго ж Дрыбіна) даводзіцца дабірацца з перасадкамі, што выклікала незадаволенасць людзей. Анатоль Ісачанка даручыў яшчэ раз вывучыць сітуацыю, разабрацца з маршрутамі прыватных перавозчыкаў і коштам іх паслуг, разгледзець магчымасць уводу рэйсавага аўтобуса дзяржаўнага аператара па буднях.

Яшчэ адзін заяўнік расказаў аб праблеме пустых жылых дамоў у вёсцы Белая Дрыбінскага раёна. Паводле яго слоў, дамы стаяць без гаспадароў ужо каля 15 гадоў, і з імі трэба нешта рабіць - напрыклад, прадаць хаця б за мінімальную суму. Кіраўніку рэгіёну далажылі, што ў вёсцы налічваецца 74 арэндныя дамы, з іх дзевяць - пустуюць больш за год. Адзін такі дом адрамантавалі, але ахвочых туды засяліцца пакуль няма. Анатоль Ісачанка падкрэсліў, што ў тэме трэба разабрацца - прыбраць статус арэнднага жылля і сапраўды выставіць на продаж, тым больш месца размяшчэння населенага пункта больш чым прывабнае - недалёка ад Магілёва.

БЕЛТА, фото mogilevnews.by