Якія вірусы зараз ходзяць у Беларусі, расказала эпідэміёлаг

Якія вірусы цяпер распаўсюджваюцца сярод насельніцтва Беларусі, расказала намеснік галоўнага ўрача па эпідэміялогіі Рэспубліканскага цэнтра гігіены, эпідэміялогіі і грамадскага здароўя Ала Дашкевіч у праекце БЕЛТА «Краіна гаворыць» на тэму «Арганізацыя работы сістэмы аховы здароўя ў перыяд уздыму сезонных вірусных захворванняў».

«Калі казаць пра этыялагічную структуру ўзбуджальнікаў, якія выклікаюць рэспіраторныя інфекцыі, то ў цяперашні час гэта негрыпозныя рэспіраторныя вірусы. Гэта вірусы парагрыпу, адэнавірусы, рынавірусы. І бактэрыяльная флора, у прыватнасці, сёлета - гэта мікоплазма», - сказала Ала Дашкевіч.

Паводле яе слоў, сезонны характар набывае і COVID-19. Каранавірусная пандэмія зламала паняцце сезоннасці, аднак зараз эпідэміялагічная сітуацыя вяртаецца да звыклай. «Напэўна, ужо другі год можам казаць, што ўсё вяртаецца на кругі свая, і тая ж каранавірусная інфекцыя ўсё больш набывае рысы сезоннай з характэрнымі ўздымамі захворвання ў асенне-зімовы перыяд», - адзначыла намеснік галоўнага ўрача.

«Кампанія вакцынацыі - адзін з элементаў падрыхтоўкі аховы здароўя і насельніцтва (да эпідэмічнага перыяду. - Заўв.БЕЛТА). Акрамя таго, арганізацыямі аховы здароўя праведзена рэвізія лекавых прэпаратаў, якія ёсць у наяўнасці, каб у сезон захворвання на рэспіраторныя інфекцыі быць гатовымі, і ложкавага фонду», - адзначыла Ала Дашкевіч.

Яна дадала, што рэспіраторныя інфекцыі працягваюць рэгістравацца цягам усяго года. «Гэта значыць, мы не кажам, што ў летні перыяд рэспіраторныя інфекцыі не рэгіструюцца. Проста іх колькасць меншая», - сказала Ала Дашкевіч.

БЕЛТА