Ярка, насычана і вельмі цікава. Бабруйск рыхтуецца сустрэць «Марафон адзінства»

«Марафон адзінства» пройдзе ў Бабруйску 15 і 16 лістапада. Арганізатары абяцаюць усім гасцям і ўдзельнікам яркую, насычаную і вельмі цікавую праграму.

Рэспубліканская грамадска-культурная акцыя «Марафон адзінства» стане для горада адной з самых чаканых і яркіх падзей восені. Гэта ўжо пяты горад на карце акцыі, якая з кожным разам набірае ўсё больш абаротаў. Бабруйск першым у Магілёўскай вобласці сардэчна сустрэне «Марафон адзінства».

Пазнаёміцца з прамысловым патэнцыялам і даведацца, чаму кааперацыя для вядучых прампрадпрыемстваў - аснова поспеху, можна будзе падчас праекта «Адну справу робім!» у першы дзень «Марафона адзінства». Такіх сустрэч у горадзе запланавана дзве: з прадстаўнікамі ААТ «МАЗ» - кіруючая кампанія холдынгу «БЕЛАВТОМАЗ» і ААТ «БЕЛАЗ» - кіруючая кампанія холдынгу «БЕЛАЗ-Холдынг».

Нефармальная абстаноўка, гульнявы інтэрактыў і магчымасць задаць пытанні гасцям будзе ў навучэнцаў Бабруйскага дзяржаўнага механіка-тэхналагічнага каледжа, Бабруйскага дзяржаўнага аўтатранспартнага каледжа і Бабруйскага дзяржаўнага аграрна-эканамічнага каледжа падчас «Нясумнай нелекцыі». Спікеры абяцаюць не толькі цікавыя сустрэчы, але і падарункі для самых актыўных удзельнікаў. У ліку прызоў - квіткі на канцэрт «Час выбраў нас».

Праект «Разам працуем, разам спяваем!» упершыню падорыць работнікам Бабруйскага завода буйнапанэльнага домабудавання сапраўдную канцэртную праграму прама ў адным з цэхаў прадпрыемства. Артысты «Марафона адзінства» падзеляцца зарадам пазітыву і добрага настрою з тымі, хто ў дні акцыі будзе працаваць на вытворчасці.

Майстар-клас ад віртуозаў Прэзідэнцкага аркестра таксама пройдзе ў першы дзень «Марафона адзінства» ў дзіцячай школе мастацтваў №2 Бабруйска імя В.В.Алоўнікава.

Дарыць настрой бабруйчанам і гасцям марафона прыедуць творчыя калектывы з Гродзенскай і Мінскай абласцей. Для іх арганізуюць экскурсіі на кіроўныя прадпрыемствы горада.

Падчас «Марафона адзінства» усе ахвочыя змогуць пагрузіцца ў гісторыю нашай краіны і даведацца пра нешта новае для сябе. Гэта можна будзе зрабіць на тэматычнай фотавыставе «Беларусь. Узлёт», падрыхтаванай Беларускім тэлеграфным агенцтвам. У архівах БЕЛТА захоўваецца вялікая колькасць здымкаў, якія яскрава дэманструюць, які шлях у сваім станаўленні і развіцці за 30 гадоў прайшла Беларусь. Дапоўніць уражанне яшчэ адна выстава, арганізаваная інфармагенцтвам, пад назвай «Суверэнная Беларусь», дзе адлюстраваны дасягненні нашай краіны ў палітычнай, эканамічнай і грамадскіх сферах. Пагрузіцца ў гісторыю партызанскага руху ў гады Вялікай Айчыннай вайны дапаможа выстава «Подзвігі і лёсы партызан у дакументах», падрыхтаваная Выдавецкім домам «Беларусь сёння» і Нацыянальным архівам. Тут прадстаўлены гістарычныя дакументы, унікальныя фатаграфіі часоў ВАВ і шмат іншага.

«Марафон адзінства» 16 лістапада будзе запальваць ля «Бабруйск-Арэны». Смачныя пачастункі, разнастайныя выставы пад адкрытым небам, яркая канцэртная праграма чакаюць усіх, хто сюды зазірне. Тут жа разгорнецца гарадскі квэст «Гэта ўсё маё роднае»: 10 тэматычных станцый, якія трэба прайсці з камандай сяброў і аднадумцаў. Самае хуткае праходжанне і выкананне ўсіх заданняў квэста забяспечаць перамогу і памятныя падарункі ўдзельнікам, у ліку якіх - білеты на канцэрт «Час выбраў нас».

Даведацца, ці лёгка быць знакамітым, змогуць удзельнікі «Знакавай сустрэчы». У час нефармальных зносін на пытанні адкажуць генеральны дырэктар Нацыянальнай бібліятэкі Беларусі Вадзім Гігін, 21-разовы паралімпійскі чэмпіён Ігар Бокій, заслужаны артыст Рэспублікі Беларусь Руслан Аляхно, радыёвядучы, галоўны рэдактар «Альфа Радыё» Вадзім Шапет.

Завяршальным і маляўнічым акордам «Марафона адзінства» стане канцэрт «Час выбраў нас». З розных раёнаў Магілёўскай вобласці ў Бабруйск прыедуць аматарскія і прафесіянальныя творчыя калектывы. Свае выступленні падораць публікі госці з Гродзенскай і Мінскай абласцей. У гала-канцэрце прымуць удзел знакамітыя беларускія артысты. Як расказалі арганізатары, тут чакаюць вядомых выканаўцаў - ураджэнцаў Бабруйска і Магілёўскай вобласці. Традыцыйна на сцэну выйдзе Юлія Быкава і гурт «Аура» з песняй «Час выбраў нас».

БЕЛТА