Яўрэйскім могілкам у Магілёве прысвоены статус гісторыка-мемарыяльнага месца

Яўрэйскім могілкам у раёне вуліц Нацыянальны спуск і Альчынскага ў Магілёве (мікрараён Юбілейны) прысвоены статус гісторыка-мемарыяльнага месца. Пра гэта паведамілі ў Магілёўскай яўрэйскай суполцы.

Яўрэйскія могілкі на Юбілейным існуюць з 1809 года. Сучасная плошча іх гістарычнай часткі складае 5 тыс. м2. На гэтай тэрыторыі знаходзіцца больш за 600 надмагілляў і надмагільных збудаванняў (склепы, «охелі») другой паловы ХІХ – пачатку ХХ стагоддзяў, у тым ліку з высакаякасных граніту і мармуру, з высокамастацкім дэкорам і паэтычнымі тэкстамі эпітафій, і старадаўняя брукаваная каменная дарога. Там спачываюць ганаровыя грамадзяне Магілёва, рэлігійныя і грамадскія дзеячы, будаўнікі, прадпрымальнікі, домаўладальнікі, дзелавая, будаўнічая, арганізацыйная і культурная дзейнасць якіх да гэтага часу вызначае асаблівасці культурнай, эканамічнай, сацыяльнай гісторыі горада і яго і архітэктурнай забудовы.

У тым ліку Цукерман Шмар’яху Мардэхай (1907–1878) – патомны ганаровы грамадзянін Магілёва, дваранін, купец першай гільдыі, мецэнат, стваральнік вядомай унікальнай бібліятэкі, банкір, заснавальнік Цэнтральнай сінагогі, якая насіла яго імя, спонсар будаўніцтва гарадской бальніцы, багадзельні, навучальных устаноў. Бабовік Моўша Гірш Вульфаў (1851–1903) – будаўнік шэрагу знакавых для Магілёва дамоў, у адным з якіх размяшчаецца Магілёўскі дзяржаўны ўніверсітэт імя А. А. Куляшова; Астроў Данііл Ільіч (1904–1941) – старшыня Магілёўскага гарвыканкама, які адыграў важную ролю ў абароне г. Магілёва ў гады Вялікай Айчыннай вайны. На месцы яго пахавання ўстаноўлены сімвалічны помнік кенатаф як аднаму з герояў Вялікай Айчыннай вайны. Прадстаўнікі сям’і купцоў Ратнераў, якія на працягу некалькіх пакаленняў з’яўляліся ганаровымі грамадзянамі Магілёва, спонсарамі будаўніцтва шматлікіх гарадскіх збудаванняў, у тым ліку бальніцы, багадзельняў, тэатра і вучылішчаў. 

«Наданне статусу гісторыка-мемарыяльнага месца пахавання старадаўнім яўрэйскім могілкам, захаванне іх культурна-гістарычнай спадчыны, добраўпарадкаванне, улік, вывучэнне і ахова – гэта рэальная магчымасць прываблівання дадатковых турыстычных паслуг, фарміравання спецыфічнага турыстычнага прадукту, рэалізацыі цікавых турыстычных праграм праз выкарыстанне гісторыка-культурных асаблівасцей рэгіёна», – расказалі ў Магілёўскай яўрэйскай суполцы.

 Большасць надмагільных помнікаў гістарычнай частцы могілак мае патрэбу ў рамонце. Праца ўжо пачата з удзелам спонсараў, мецэнатаў і сваякоў пахаваных тут людзей.

mogilevnews.by