Юрый Назараў: своечасовая мадэрнізацыя прадпрыемстваў дазваляе павышаць канкурэнтаздольнасць прадукцыі

Своечасовая мадэрнізацыя прамысловых прадпрыемстваў дазваляе павышаць канкурэнтаздольнасць прадукцыі. Такое меркаванне выказаў намеснік прэм’ер-міністра Юрый Назараў падчас рабочага візіту на «Магілёўхімвалакно».

Падчас візіту віцэ-прэм’ер азнаёміўся з тэхналагічнымі працэсамі і рэалізацыяй інвестпраекта «Комплекс па вытворчасці поліэфірнай прадукцыі».

«Падчас сустрэчы мы абмяркоўвалі не глабальныя пытанні нафтахімічнай галіны, а будучыню «Магілёўхімвалакно». У нас ёсць два праекты. На мой погляд, іх зацягнулі, але тым не менш сёння мы канчаткова прынялі рашэнне аб тым, што на магілёўскім прадпрыемстве прыступаюць да рэалізацыі праекта па вытворчасці тэхнічных нітак. Мы паглядзелі старую вытворчасць: гэта вялікая і незагружаная плошча. У найбліжэйшы час тут будзе кампактная і сучасная вытворчасць. Я спадзяюся, што ў красавіку мы зробім першы плацёж і прыступім да выканання кантрактных абавязацельстваў. Гэты праект добры і своечасовы, ён дазволіць аптымізаваць выдаткі на «Магілёўхімвалакно»: амаль на 50% дазволіць скараціць сабекошт нашай прадукцыі, а гэта павышэнне канкурэнтаздольнасці вырабаў», – падкрэсліў Юрый Назараў.

Па словах генеральнага дырэктара ААТ «Магілёўхімвалакно» Пятра Рудніка, у якасці першай чаргі інвестпраекта рэканструяваная ўстаноўка бесперапыннай полікандэнсацыі. Гэта дазволіла арганізаваць вытворчасць грануляту поліэтылентэрэфталату тэкстыльнага прызначэння і выраб поліэфірнага валакна магутнасцю 50 тыс.т на год з выпускам новых, запатрабаваных на рынку валокнаў тыпу «канжугейт» у аб’ёме 25 тыс. т і да 25 тыс. т на год валакна стандартных асартыментаў з палепшанымі якаснымі характарыстыкамі.

Першая чарга праекта была ўведзена яшчэ ў 2018 годзе. Гэта дазволіла прадпрыемству перайсці на выпуск прадукцыі па сучаснай тэхналогіі з тэрэфталевай кіслаты, асвоіць новыя асартыменты валокнаў тыпу «канжугейт» і забяспечыць сыравінай палепшанай якасці ААТ «СветлагорскХімвалакно».

«У найбліжэйшую пяцігодку мы плануем рэалізаваць у ліку іншага шэраг невялікіх інвестыцыйных праектаў, агульны кошт якіх вар’іруецца ад 80 да 100 млн еўра. І першы з іх–гэта мадэрнізацыя вытворчасці тэхнічных нітак. Па выніках 2020 года кошт тэхнічных нітак склаў 1,2 тыс. еўра за тону. Новая вытворчасць дасць магчымасць знізіць выдаткі амаль напалову. Гэта патрэбная вытворчасць. Мы зможам павялічыць нашу долю на замежных рынках: у нас выйгрышнае геаграфічнае становішча, якое дазволіць знізіць лагістычныя выдаткі. На постсавецкай прасторы ўсяго два прадпрыемствы, якія займаюцца выпускам тэхнічных нітак, – Магілёў і завод у горадзе Волжскім у Расійскай Федэрацыі. А тэхнічныя ніткі маюць вельмі шырокае прымяненне: банерныя тканіны, тэнты для грузавых аўтамабіляў, дахавыя матэрыялы і іншае. І ўжо ў красавіку мы прыступім да актыўных работ у гэтым кірунку», – падкрэсліў Пётр Руднік.

Абмяркоўвалася і пытанне аб новай лініі па вытворчасці тэхнічнай стужкі і рацыянальным выкарыстанні пустуючых вытворчых плошчаў. «Сёння мы паглядзелі плошчы, якія ёсць у прадпрыемства. Гэта гатовыя вытворчыя памяшканні, якія проста трэба прывесці ў парадак, іх можна здаваць у арэнду невялікім вытворчасцям. І мы дамовіліся, што трэба падбіраць невялікія і кампактныя інвестыцыйныя праекты, – адзначыў віцэ-прэм’ер. – Акрамя гэтага, у прадпрыемства ёсць магчымасць запусціць дадатковую вытворчасць. Зараз, напрыклад, тут з адходаў вырабляюць тэхнічную стужку для ўпакоўкі. З нашай краіны вывозяць вялікі аб’ём піламатэрыялаў, а дзе браць для іх стужку? Выходзіць, што мы закупляем яе. А для таго каб насыціць унутраны рынак, трэба паставіць яшчэ адну невялікую лінію коштам каля 1,5 млн еўра. Гэта дазволіць забяспечыць унутраны попыт на такі від прадукцыі».

Юрый Назараў таксама сустрэўся і з калектывам прадпрыемства, абмяркоўваліся асноўныя пасылы VI Усебеларускага народнага сходу. Паводле слоў віцэ-прэм’ера, людзі добра інфармаваныя аб прынятых на маштабным форуме прапановах.

БЕЛТА