«З акцэнтам на сельскіх жыхароў». Аблздароўе аб развіцці сістэмы аховы здароўя Магілёўскай вобласці

У Магілёўскай вобласці намечана далейшае ўдасканаленне сістэмы аховы здароўя на 2025-2030 гады на абласным, раённым і міжраённым узроўнях з акцэнтам на сельскіх жыхароў. Аб гэтым журналістам расказаў начальнік галоўнага ўпраўлення па ахове здароўя Магілёўскага аблвыканкама Уладзімір Гацко на адкрыцці пасля рэканструкцыі Шклоўскай цэнтральнай раённай бальніцы.

«Сістэма аховы здароўя Магілёўскай вобласці дынамічна развіваецца, - падкрэсліў Уладзімір Гацко. - У мінулым вялікая работа праведзена па ўмацаванню матэрыяльна-тэхнічнай базы апорных абласных клінік, сёння актыўна ўдасканальваецца матбаза абласных і раённых устаноў аховы здароўя. Так, у Дзень народнага адзінства (і гэта сімвалічна) мы адчыняем пасля капітальнага рамонту Шклоўскую цэнтральную раённую лякарню. У цэлым на яе рэканструкцыю выкарыстана амаль Br21 млн асігнаванняў з абласнога бюджэту. У сваю чаргу, Міністэрства аховы здароўя амаль на Br5,5 млн паставіла сюды абсталяванне: камп'ютарныя тамографы, апарат ШВЛ і гэтак далей. Усё тое, што неабходна для функцыянавання ўстановы, аказання якаснай і даступнай медыцынскай дапамогі. Акрамя таго, з абласнога і раённага бюджэтаў на суму больш як Br1 млн набыта абсталяванне для бальніцы і ўрачэбных амбулаторый».

Паводле слоў Уладзіміра Гацко, зараз у рэгіёне ідзе некалькі маштабных будоўляў на аб'ектах галіны. Так, актыўна вядуцца работы па рэканструкцыі Хоцімскай цэнтральнай раённай бальніцы, якую плануюць увесці ўжо ў кастрычніку гэтага года, будуецца новы корпус для аказання экстранай дапамогі пацыентам з кардыяцэрэбральнай паталогіяй Магілёўскай клінічнай бальніцы хуткай медыцынскай дапамогі - амаль 3,5 тыс. кв.м, аснашчаных. самым сучасным абсталяваннем. Яго адкрыццё плануецца сёлета ў лістападзе. Вядзецца рэканструкцыя Чэрыкаўскай ЦРБ - ужо ўведзены ў строй першыя два пускавыя комплексы, і ў снежні завершацца работы на трэцім. Таксама праводзіцца рэканструкцыя галоўнага корпуса Быхаўскай ЦРБ, які будзе аснашчаны ўсім неабходным абсталяваннем, ідзе будаўніцтва рэабілітацыйнага корпуса Магілёўскай абласной дзіцячай бальніцы і васьміпавярховага хірургічнага корпуса Бабруйскай гарадской бальніцы ХМД.

«У рэгіёне функцыянальна прадумана лагістыка аказання медыцынскай дапамогі з улікам абласных і міжраённых аддзяленняў, - адзначыў начальнік галоўнага ўпраўлення. - Старшыня аблвыканкама вялікую ўвагу ўдзяляе сістэме аховы здароўя, аказанню неабходнай дапамогі насельніцтву. Безумоўна, усё робіцца для людзей і для таго, каб медычная дапамога была даступная. Гэта пазіцыя кіраўніка дзяржавы: каб жыхары не толькі ў буйных населеных пунктах, але і ў вёсцы маглі атрымаць неабходную дапамогу. Для гэтага наладжана належнае ўзаемадзеянне: у краіне выбудавана чатырохузроўневая сістэма аказання дапамогі. Пацыенты, якія знаходзяцца нават у малых населеных пунктах, маюць магчымасць даступна, у тым ліку праз тэлемедыцынскае кансультаванне, атрымаць заключэнне неабходных спецыялістаў. Акрамя таго, арганізуюцца выезды з рэспубліканскіх навукова-практычных цэнтраў і медыцынскіх універсітэтаў для таго, каб чалавеку своечасова быў пастаўлены дыягназ і прызначанае неабходнае лячэнне».

БЕЛТА