З пачатку пандэміі ў Магілёўскай вобласці нарыхтавалі 165 літраў імуннай антыкавіднай плазмы

Чым больш доўжыцца пандэмія, тым больш людзей перанеслі каранавірусную інфекцыю і, адпаведна, больш жадаючых здаць плазму. Толькі вось стаць донарам можа далёка не кожны, у чым я пераканалася на асабістым вопыце.

На бальнічным з COVID-19 я апынулася яшчэ ў пачатку снежня і ўжо тады выразна для сябе вырашыла дапамагчы іншым, здаўшы плазму. Вычакала пару месяцаў, падрыхтавала неабходныя дакументы і адправілася на Магілёўскую абласную станцыю пералівання крыві.

Адразу адзначу, што санітарныя і супрацьэпідэмічныя нормы тут строга выконваюцца, каб не нашкодзіць ні донару, ні рэцыпіенту – чалавеку, якому ў далейшым будзе пераліта плазма. На ўваходзе ўсіх наведвальнікаў сустракае супрацоўнік –вымярае тэмпературу, просіць апрацаваць рукі і надзець маску.

У рэгістратуры выдаюць анкету і правяраюць паперы: выпіску з медкарты аб перанесеным захворванні, флюараграфію, кардыяграму. Жанчынам таксама патрэбна даведка аб аглядзе ў гінеколага не пазней за шэсць месяцаў.

Адсеў патэнцыйных донараў вялікі. У спіс супрацьпаказанняў уваходзяць, напрыклад, нядаўна перанесеныя аперацыі, вага не менш за 60 кілаграмаў. Не бяруць і людзей, якія перахварэлі на пнеўманію, бо па правілах у гэтым выпадку трэба вычакаць паўгода пасля выздараўлення і зрабіць кантрольны здымак, які пацвярджае адсутнасць паталогій.

І нават калі з усімі вышэйпералічанымі пунктамі поўны парадак, не факт, што вы падыходзіце. На заключным этапе робіцца кантрольны аналіз на колькасць антыцелаў, і калі тытр нізкі –да пабачэння. Прычым гэты паказчык не залежыць ні ад цяжару захворвання, ні ад узросту, ні ад полу, ні ад якіх іншых фактараў –індывідуальная асаблівасць арганізма.

Тут, дарэчы, я і зрэзалася. Далей назірала за працэсам ужо як журналіст, суправаджаючы ганаровага донара Аляксандра Вераксу. Магілёвец здае кроў і плазму на працягу пяці гадоў:

– Перахварэў кавідам ў канцы зімы ў лёгкай форме (самае цікавае, што жонка і дзіця вірус не падхапілі). У цэлым лічу донарства ідэальным спалучэннем –магчымасцю дапамагчы іншым людзям і зарабіць дадатковую капейку ў сямейны бюджэт. Таму я тут.

Спачатку Аляксандр наведаў кабінет загадчыцы аддзялення камплектавання донарскіх кадраў, дзе Анжаліка Чыканава правяла агляд стану і дала допуск да данацый. Адтуль адправіўся ў буфет. Зефір, мармелад, гематаген, печыва, сокі –донарскі сняданак дапамагае лягчэй перанесці страту 600 мілілітраў плазмы. У канчатковым пункце, донарскай зале, пацыент затрымліваецца на 30–40 хвілін, пакуль доўжыцца працэдура забору кампанентаў крыві.

Магілёўская абласная станцыя пералівання крыві займаецца нарыхтоўкай імуннай антыкавіднай плазмы з мая 2020 года –165 літраў донарскага матэрыялу дапамогуць больш за 800 чалавек з каранавірусам.

– Першы час самі шукалі донараў, у паліклініках бралі кантакты перахварэлых ва ўзросце 25–45 гадоў, тэлефанавалі, запрашалі да нас – расказала загадчыца аддзялення захоўвання і выдачы прадуктаў крыві станцыі Вікторыя Яраховіч. – Спачатку людзі ставіліся да нашых просьбаў насцярожана, паколькі інфармацыі аб інфекцыі на той момант было няшмат. Але крок за крокам сітуацыя змянялася, і ў другую хвалю пацыенты самі сталі праяўляць ініцыятыву. Хтосьці здае плазму нават не адзін, а два, тры, чатыры разы.

Антыкавідную плазму ў медустанове ўжо нарыхтавалі ў дастатковай колькасці, але паўстала іншая праблема – недахоп звычайных донараў крыві. Адны хварэюць, іншыя вытрымліваюць належныя тэрміны пасля выздараўлення. Таму станцыя пералівання запрашае жыхароў Магілёўскай вобласці да супрацоўніцтва. А каб не заблытацца ва ўсіх правілах,складаных толькі на першы погляд, патэнцыйныя донары плазмы могуць уважліва вывучыць інфармацыю на сайце медустановы, а таксама запісацца на кансультацыю або ўдакладніць усё па тэлефоне.

СБ