За цяперашні сезон Глускае райст плануе замарозіць больш за дзве тысячы тон ягад і грыбоў

За цяперашні сезон Глускае райст плануе замарозіць больш за дзве тысячы тон ягад і грыбоў. Іх у насельніцтва закупляюць 14 нарыхтоўчых пунктаў і ўсе крамы раённага спажывецкага таварыства. Некаторая частка прадукцыі паступае на перапрацоўку ў цэх замарозкі на давальніцкіх умовах. Калі гаварыць аб перапрацоўцы ягад, то работнікі цэха пачалі ў гэтым сезоне з замаразкі клубніц. Як паведаміла начальнік планава-эканамічнага аддзела райст Алена Зайцава, усяго гэтай ягады закупілі ў насельніцтва 26 тон, з іх 21 тону рэалізавалі на ААТ «Навафрут», 3,7 тоны замарозілі, астатнія клубніцы паступілі ў нашу гандлёвую сетку. Таксама было замарожана каля 3,4 тоны чорнай парэчкі, 1,4 тоны вішні, 1,7 тоны брусніцы, 0,3 тоны дурніцы. Замарожаныя ягады будуць рэалізоўваць у магазіны рэспублікі. Таксама на давальніцкіх умовах цэх перапрацоўваў чорную парэчку і чарніцы. Чорная парэчка паступала ад камерцыйных фірмаў, а лясная ягада – ад калег з Клічава, Кіраўска і Чэрыкава. Наогул, чарнічны ўраджай сёлета парадаваў мясцовых кааператараў: ад насельніцтва прынялі 215 тон чарніц. Амаль 200 тон гэтай ягады замарозілі і экспартавалі ў Польшчу і Літву, 1,8 тоны свежай прадукцыі прадалі на рынках Мінска і Бабруйска.

Акрамя ягад, у цэху марозяць таксама грыбы. Для разнастайнасці асартыменту ў крамах у гэтым грыбным сезоне работнікі цэха перапрацавалі, праўда, у невялікім аб’ёме, лісічкі. Круглы год, з перапынкамі, у цэху замарожваюць шампіньёны, іх падаюць у якасці давальніцкай сыравіны камерцыйныя фірмы. З пачатку гэтага года перапрацавана больш за 1600 тон грыбоў. На мінулым тыдні нам удалося паназіраць за працэсам шокавай замарозкі шампіньёнаў, за кулісы цэха нас правяла старшы майстар Ірына Супрончык. Грыбы рухаюцца па васьміметровым канвееры, адразу шампіньёны мыюцца ў шчотка-мыйнай, потым у барбатажнай машыне, пасля трапляюць пад нож у рэзанне, далей – на інспекцыйны транспарцёр, тут спецыяліст сочыць за якасцю прадукту, пасля гэтага грыбы ідуць у флюідызацыйны хуткамаразільны тунэль. Час замаразкі шампіньёнаў –каля васьмі хвілін, шокавая замарозка пры тэмпературы мінус 40°С дазваляе захаваць іх знешні выгляд, смак і карысныя ўласцівасці. На выхадзе з тунэля гатовы прадукт мае тэмпературу мінус 18 °С, грыбы фасуюць у скрынкі і адпраўляюць у камеру захоўвання. На працягу некалькіх дзён гатовы прадукт з’язджае да свайго заказчыка.

Зусім хутка на канвееры з’явяцца журавіны, іх збор пачаўся з другога верасня. Усяго па плане райст неабходна нарыхтаваць 45 тон гэтай ягады, асноўную частку прадукцыі кааператары плануюць замарозіць.

glusk.by