Запаўняльнасць здраўніц Магілёўшчыны па выніках дзевяці месяцаў наблізілася да 80%

Запаўняльнасць санаторна-курортных арганізацый Магілёўскай вобласці па выніках трох кварталаў бягучага года наблізілася да 80 працэнтаў, перавысіўшы паказчыкі аналагічнага перыяду 2021 года. Пра гэта паведамілі ў Рэспубліканскім цэнтры па аздараўленні і санаторна-курортным лячэнні насельніцтва.

– Запаўняльнасць санаторна-курортных арганізацый Магілёўскай вобласці за студзень-верасень 2022 года склала 78 працэнтаў, – праінфармавалі ў цэнтры. Для параўнання: аналагічны паказчык за 9 месяцаў 2021 года – 70,6 працэнта.

За студзень-верасень гэтага года санаторыямі вобласці было рэалізавана 25 194 пуцёўкі – на 1287 больш, чым за аналагічны перыяд 2021 года. З агульнага аб’ёму прададзеных пуцёвак 41 працэнт – гэта пуцёўкі, рэалізаваныя Рэспубліканскаму цэнтру па аздараўленні і санаторна-курортным лячэнні насельніцтва, 29,6 працэнта прыпадае на рэалізацыю юрыдычным асобам, 29,4 працэнта – фізічным асобам. Пры гэтым павялічыўся продаж пуцёвак праз турыстычныя арганізацыі ў 2,3 раза.

Выручка ад рэалізацыі ўсіх санаторна-курортных паслуг склала 19,7 мільёна рублёў, гэта на 23 працэнты вышэй да студзеня-верасня 2021 года, у тым ліку выручка ад рэалізацыі дадатковых платных паслуг – 2,1 мільёна рублёў – на 30,5 працэнта больш.

– Значным напрамкам у працы санаторна-курортных арганізацый з’яўляецца экспарт паслуг, – нагадалі ў цэнтры. – За 9 месяцаў бягучага года ў здраўніцах Магілёўшчыны атрымала санаторна-курортнае лячэнне 3815 чалавек з блізкага і далёкага замежжа. Пераважная большасць – грамадзяне Расійскай Федэрацыі (3590 чалавек, ці 94,1 працэнта). Агульная колькасць замежных грамадзян узрасла ў параўнанні з мінулым годам на 60,1 працэнта.

Атрыманы аб’ём экспарту санаторна-курортных паслуг у студзені-верасні 2022 года склаў 3,4 мільёна рублёў і павялічыўся ў параўнанні з аналагічным перыядам 2021 года на 82,5 працэнта.

У мэтах павышэння попыту на санаторна-курортныя і аздараўленчыя паслугі, забеспячэння стабільнай працы санаторыямі вобласці пастаянна ўдасканальваецца матэрыяльная база, укараняюцца новыя віды паслуг.

– На ўмацаванне матэрыяльна-тэхнічнай базы ў студзені-верасні санаторыямі было накіравана 1,9 мільёна рублёў, – удакладнілі ў цэнтры. – З гэтай сумы найбольшая колькасць сродкаў была накіравана санаторыямі «Сосны» ААТ «Магілёўхімвалакно», ДУП «Санаторый імя У. І. Леніна» і «Дубравенка» РУП «Магілёўскае аддзяленне Беларускай чыгункі».

Здраўніцамі з мэтай прыцягнення адпачывальнікаў шырока прапануюцца бонусы, праграмы лаяльнасці ў выглядзе зніжак, розныя акцыйныя прадукты, у тым ліку бонусы да пуцёўкі пры браніраванні ў перыяды нізкага попыту, сезонныя зніжкі, ранняе браніраванне, «гарачыя пуцёўкі».

СБ